BANDUNG (NYUNDAYU), – Anggotra Komisi V DPRD Jabar – nu salah sahijina ngawidangan olahraga – H. Yod Mintaraga ngarasa prihatin ku dibatalkeunna Indonesia jadi tuan rumah pahelatan final Piala Dunia U-20, kaasup gagalna Timnas ilubiung tandang dina pahelatan internasional éta. Kajadian ieu diniléy ngotoran citra Indonesia di mata dunya.
“Abdi ngaraos sedih sareng prihatin, hal nu parantos disiapkeun mangtaun-taun, teras di panungtungan badé pahelatan, malah dibatalkeun. Lebarna FIFA ogé teu masihan alesan nu jelas sareng terbuka, kunaon dibatalkeun, iwal ti nyebut ‘lantaran situasi panganyarna’,” ceuk anggota Fraksi Partai Golkar ti Dapil Tasikmalaya ieu.
Siga nu geus dipikanyaho, dina 2019 Indonesia ngameunangkeun bidding pikeun nangtukeun tempat palaksanaan final PIala Dunia U-20, ngéléhkeun Peru jeung Brazil. Kameunangan ieu dibagéakeun ku kabungah ti fans sepakbola lemah cai. Pamaréntah ogé geus ngagolontorkeun dana triliunan rupia pikeun nga-upgrade stadion jeung nyiapkeun rupa-rupa fasilitas.
“Pami alesanna kumargi séntimén anti-Israél, pan urang tos lami terang yén ti Juni 2022 kamari basa Israél lolos kualifikasi sareng pasti maén di Indonesia. Kunaon protés ka Israél teu ditunjukkeun taun kamari, sareng malahmah kantun 2 sasih deui tina rancana palaksanaan. Komo, teu dina tempatna olahraga diadukeun sareng pulitik,” tandes Ketua Depidar SOKSI Jabar ieu.
Kitu ogé lamun alesan dibolaykeunna kulantaran stadion atanapi fasilitas na aya nu kurang, kuduna FIFA nu ngasupervisi sacara rutin, méré saran ti kamari-kamari. “Hartosna, FIFA ogé kedahna masihan arahan nu teges sual ieu,” ceuk Yod sabari nambahan, PSSI kudu bener-bener sadar jeung ngaévaluasi léngkahna ku kagagalan ieu.
Inyana manglebarkeun, pajoangan nu geus lila dilakukeun, leungit kitu waé. “Abdi ningali ku nyesekna dada para pamaén Timnas nu tos lami nyiapkeun diri kanggo event saageung ieu. Teu acan deui fans sepakbola Indonésia nu teu apal kedah ngantos iraha deui Indonésia tiasa janten tuan rumah,” tegesna.**
Éditor: Dadan Hendaya
