BANDUNG (NYUNDAYU.COM),- Politisi Partai Golkar ti Jawa Barat, Drs. H. Yod Mintaraga, MPA, kacatet jadi anggota législatif panglilana, nyaéta dalapan periode. Inyana jadi anggota DPRD Kota Bandung salila opat periode: 1992-1997, 1997-1999, 1999-2004 jeung 2004-2009. Terus disambung ku jadi anggota DPRD Jabar Masa Bakti 2009-2014, 2014-2019 jeung 2019-2024.
Panungtung, Yod oge bakal deui jadi anggota DPRD Jabar periode 2024-2029, satutas nyangking sora panglobana ti Partai Golkar di Dapil 15 (Kota jeung Kab. Tasikmalaya) ku meunang sora leuwih ti 51rebu. Ku kituna, mun inyana nuntaskeun masa baktina taun 2029 engké, hartina Yod bakal nyéépkeun waktu di Déwan salila 37 taun!
Kameunangan Yod di Dapil Tasikmalaya dina Pileg 2024 ieu sabenerna geus lila diprédiksi ku loba pihak. Hal éta disababkeun penetrasina ku hadé di tengah masarakat, ku rajin ngarawat sora arus bawah ngaliwatan program-programna ku miboga mangpaat nu karasa ku masarakat.
Kaukus Journalis untuk Demokrasi Jabar, misalna, dina panungtung taun kamari geus ngalansir hasil survey nu nyebutkeun, Yod jadi favorit pikeun balik deui jadi anggota Déwan, nu moal kaoyagkeun ku pasaing séjén dina internal partai.
Basa ditanya media naha teu nyalonkeun diri ka lével législatif pangluhurna DPR RI, pituin warga Désa Cipondok, Kec. Sukaresik, Kab. Tasikmalaya ieu nyebutkeun, tawaran ti Golkar keur maju jadi caleg DPR geus sababaraha kali ditepikeun.
Ngan lalaki nu digadang-gadang jadi calon kuat Bupati Tasikmalaya ieu milih tetep di Jabar, kulantaran hayang kénéh ngawal sababaraha program strategis hususna di Priangan TImur, siga pamekaran daérah otonom anyar Tasikmalaya, sarta ngadorong percepatan pangwangunan infrastruktur Jalan Tol Gedebage-Tasik-CIlacap.
Rékor MURI
Dumasar tina catatan media, “gelar” anggota Déwan panglilana kungsi disangking ku politisi senior Partai Golkar lianna, Ceu Popong Otje Djundjunan. Inyana ngajabat salaku anggota Déwan ti taun 1987 jeung bérés di taun 2019. Total aya 32 taun waktu pangabdian salaku anggota Déwan.
Ceu Popong oge kungsi nyangking rékor ti MURI (Museum Rékor Indonesia), sabab masa jabatan nu panjang jeung sangkingan pangajén nu kacida lobana salila masa profésionalna.
Kulantaran éta, teu héran lamun sababaraha pihak nyebutkeun, Yod Mintaraga ayeuna pantes nyangking prédikat ti MURI pikeun lalampah panjangna di législatif. Komo Ketua Depidar SOKSI Jawa Barat éta ogé teu saeutik nyangking préstasi jeung pangajén.
Dina salah sahiji kasempetan temu kader di Cafe Siloka, Tasikmalaya, Waketum DPP Partai Golkar Ridwan Kamis kungsi nyebutkeun, “Mang Yod ieu parantos 7 kali janten Déwan, kedah lebet Rékor MURI. Komo ayeuna badé ka 8 kalina, tos pasti kedah lebet Rékor MURI,” ceuk mantarn Gubernur Jabar ieu.
Ridwan Kamil ménta ka para politisi ngora pikeun diajar jeung nimba pangalaman ka Yod Mintaraga. “Caleg nu ngora-ngora kudu diajar ka Mang Yod, kumaha ngabentuk rélawan jeung ngaorganisasikeunnana,” tandes lalaki nu remen dilandi Kang Émil ieu.**
Éditor: Dadan Hendaya
