BANDUNG (NYUNDAYU). – Kompléks élit di daérah Pasteur Kota Bandung, nyatana teu weléh jauh ti masalah. Faktana, jalan kiduleun Kompléks Istana Regency remen ngalaman banjir, mun hujan turun. Proyék ngagedéan gorong-gorong jadi solusina, ngan wargana pada protés, kulantaran katémbong teu méréskeun masalah.
“Abdi héran ku diageunganna gorong-gorong ieu. Pami diperhatoskeun, luhurna urang sareng komplék TNI AU nu dipengker téh sami, janten kanggo naon diwangun gorong-gorong enggal, pami caina ogé teu ngalir kaluar,” ceuk tokoh warga satempat, Yosef Yulia, ka média, Salasa (4/10).
Inyana nganiléy, proyék saniléy 355 juta éta téh akal-akalan ti Ketua Himpunan Warga Istana Regency (HWIR) nu masa jabatanna kakara bérés, Suwito Chandra. “Kedahna mah anjeunna di ahir masa jabatanna teu ngadamel proyék sapertos kieu. Komo deui padamelan éta dilakukeun teu (ngalangkungan) musyawarah sareng kasapukan ti warga,” tegesna.
Numutkeun anjeunna, proyék antisipasi banjir ieu teu asup akal. Kusabab basa gorong-gorong di Blok E digedéan, walungan di Blok F di hareupeun imah Suwito, kalahka ditutup ku alesan keur lahan parkir. Ditutupna jalur walungan di Blok F éta oge teu ngaliwatan kasapukan warga, jeung ayeuna keur aya dina pamariksaan ti patugas Pemkot Bandung.
“Aya naon ieu, palih dieu diageungan, mung anak walungan nu caket bumina malah dipendet atanapi diurug. Abdi parantos nyungkeun Dinas kakait kanggo ngecék langsung ka dieu, supados sadayana janten caang ngempray masalahna. Warga mah mung palay banjir tiasa enggal kaungkulan,” pokna.
Inyana ogé geus nyarita ka sajumlah warga, kaasup nu boga imah di hareupeun proyék nu remen kabanjiran. “Pa Budi nu percis di payuneun anak walungan éta, pasti kabanjiran pami usum hujan. Anjeunna oge cangcaya proyék ieu baris mampuh ngungkulan banjir di daérah éta. Kumargi cai mah tetep moal ngalir kaluar,” tandes Yosef.**
Éditor: Dadan Hendaya
