BANDUNG (NYUNDAYU). – Panuntasan konstruksi Jalan Tol Cileunyi-Sumedang-Dawuan atawa Tos Cisumdawu, ditargét bakal rampung ahir taun 2022. Jalan nu disebut-sebut bakal jadi jalan tol ku panénjoan alam pangéndahna éta, dipercaya bakal nyieun pamaké Bandara Kertajati naék sacara signifikan.
Numutkeun Asisten Ekonomi dan Pembangunan (Ekbang) Setda Jabar, Taufiq Budi Santoso, Pemprov Jabar terus ngadorong pamaréntah pusat pikeun pangwangunan bisa bérés tepat waktu. “Di panungtungan Desember réngsé, waktu tempuh ti Bandung ka Kertajati Majaléngka mung saukur sajam,” pokna.
Hal ieu diungkabkeun Taufik basa jadi pembicara dina diskusi nu judulna “Kupas Tuntas Bandara Kertajati” nu digelar Kadin Jabar jeung Jaringan Media SIber Indonésia (JMSI) Jabar, Jumat (9/9), di Menara Kadin Jabar, Jl. Sukabumi Bandung.
Ngan salah sahiji peserta diskusi via zoom, Beben cangcaya Desember bakal bérés. “Seksi 3 dugi ka 6 ti Sumedang dugi ka Dawuan éta dihandap 40% kénéh, teu acan deui kontur taneuh nu rumit nu ngadamel padamelan langkung lami. Saur Abdi mah nembé tengah taun payun nembé réngsé. Éta ogé pami pihak Badan Usaha Jalan Tol seurius ngudag targét,” tandesna
Dirut PT. Bandarudara Internasional Jawa Barat (BIJB) Muhammad Singgih sabérés diskusi ngomong, “Abdi jelas miharep tiasa réngsé panungtung taun ieu saluyu sareng nu didugikeun BIJB, mung katingalina nembé tiasa dianggé taun payun.”
Kunaon Tol Cisumdawu?
Ketua Kadin Jabar kungsi nanyakeun, naha katingalina solusi sepina Bandara Kertajati ngan malulu disababkeun ku tayana aksés jalan Tol Cisumdawu. Kusabab liwat Tol Cipali, urang Karawang ngan sajam ka Kertajati, urang Purwakarta leuwih gancang deui. “Teras pan urang Cirébon, Indramayu, Majalengka atanapi Kuningan mah teu peryogi Tol Cisumdawu, sareng aranjeunna tetep teu ka Kertajati,” ceuk Cucu Sutara.
Kitu ogé mun urang Bandung, saenyana ngan butuh 2,5 jam pikeun nepi ka Kertajati via Tol Purbaleunyi diteruskeun ka Tol Cipali. “Janten teu acan tangtos urang teu milih Kertajati kulantaran teu acan aya Tol Cisumdawu. Seueur pisan faktor nu ngadamel Kertajati sepi kénéh dugi ka ayeuna. Éta nu kedah dikupas tuntas kunaon sababna,” tegesna.*
Editor : Dadan Hendaya
