BANDUNG (NYUNDAYU), – Lembah Tengkorak, ngadéngé ngaranna wungkul geus pasti kabayang hal-hal nu pikasieuneun. Padahal nyatana teu kitu. Lembah Tengkorak nyaéta hiji tempat wisata nu nawarkeun téténjoan alam nu mangrupa situ leutik di tengah leuweung nu asri pisan. Déstinasi wisata Lembah Tengkorak ieu lokasina aya di Bandung TImur atawa perenahna di Kadakajaya, Kacamatan Tanjungsari, Kabupatén Sumedang, Jawa Barat.
Tempat ieu disebut ogé Situ Putri atawa katelah ku masarakat lokal mah Situ Urug. Didempét ku dua gunung sakaligus nyaéta Gunung Pangparang jeung Gunung Sanggara.
Lembah Tengkorak kabentuk ku tilas longsoran gawir Gunung Pangparang nu nyésakeun batuan warna bodas. Dina ahir 2017 kajadian deui longsoran kadua nu ngakibatkeun kabentukna situ leutik nu disebut warga mah Danau Urugan.
Lokasina nu nyumput di tengah leuweung nyieun para pangunjung kudu ngajugjug ku bari leumpang salila 3 nepika 4 jam atawa sajauh 7 kilométer ti imah warga nu jadi tempat panitipan motor. Atanapi 1 nepika 2 jam maké motorcross.
Aya dua jalur nu bisa dipilih, nyaéta jalur wewengkon Argo Wisata Kebun Kina, Palintang, Kabupaten Bandung atanapi jalur Kampung Pasir Kaliki, Sukasari, Kabupatén Sumedang.
Ku kituna, pangunjung Lembah Tengkorak kudu aya dina kaayaan séhat jeung boga stamina nu hadé. Pangunjung ogé mun bisa mah mawa sasadiaan inuman jeung kadaharan kulantaran sapanjang lalampahan éta moal nimu padagang atanapi warung-warung leutik.
Di satukangeun héséna aksés ka Lembah Tengkorak, lalampahan bakal karasa leuwih ngabungahkeun kulantaran téténjoan nu dipidangkeun éndah pisan. Urang bakal ningali jajaran kebon nu warga jeung deretan tangkal leubeut nu héjona nyegerkeun panon. Hawa ogé karasa tiis sabab jauh ti pusat kota jeung aya di dataran tinggi. Sagigireun éta, suasana nu ditawarkeun cocok pisan keur nu resep katenangan atanapi jelema nu geus capé ku raména kota.
Salian ti éta, panorama nu bisa dipikanikmat mun nepi ka Lembah Tengkorak ogé luar biasa. Sakabéh kacapé nu karasa salila lalampahan, dipastikeun leungit nalika ningali hiji situ nu caina biru semu héjo nu dikurilingan ku tangkal.
Lembah Tengkorak bisa jadi spot foto favorit pikeun nu hobby fotografi. Komo mun keur halimunna turun jeung nyimbutan wewengkon, jelas pisan mistis karasana. Hasilna kana foto jadi leuwih éndah.
Ngadatangan Lembah Tengkorak teu kudu ngodok saku jero teuing. Pangunjung ngan kudu mayar Rp10.000 di pos asup ka daérah warga. Sanggeus nitipkeun kandaraan di imah warga, urang teu kudu ngaluarkeun deui duit.**
Sumber: bandungraya.inews.id/Rizal Fadillah
