BANGKOK (NYUNDAYU), – Saurang supir di Thailand dipoyok sacara online sanggeus teu kahaja ninggalkeun pamajikannana basa eureun kahampangan. Gara-gara poho diangkut deui, pamajikanna dipaksa leumpang sajauh 20 km pikeun néang bantuan. Boontom Chaimoon (55) nyangka pamajikanna, Amnuay Chaimoon (49), aya di korsi tukang jeung saré sajajalan.
Inyana ménta hampura ka pamajikanna basa panggih deui. Kajadian ieu lumangsung dina Poé Natal, 25 Desember 2022. Boontom jeung pamajikanna mimitina rék iinditan liwat jalur darat dina Minggu jam 03.00 subuh pikeun méakkeun Taun Baru di lemburna di Provinsi Maha Sarakham.
Mimitina taya masalah nepika salakina ngomong hayang kahampangan jeung markir mobilna di sisi jalan. Amnuay, numutkeun laporan média lokal, nanya naha teu eureun di pom bengsin. Basa salakina teu ngajawab, Amnuay ogé mutuskeun turun rék kahampangan ogé di deukeut leuweung.
Boontom sigana teu nyadar yén pamajikanna ogé ngilu turun tina mobil pikeun kahampangan. Basa pamajikanna balik ka tempat di mana mobil éta diparkir, inyana ningali mobil nu disupiran ku salakina geus euweuh. Inyana nyadar salakina geus ninggalkeun manéhna sorangan di sisi jalan popoékan. Ngarasa sasab jeung sieun, Amnuay mutuskeun pikeun leumpang ka distrik Kabin Buri-nu jarakna sakitar 20 km.
Sanggeus lalampahan nu katingalina euweuh tungtungna, inyana nepi ka hiji tempat jam 05.00 janari, terus ngalapor ka kantor pulisi satempat. Ngan, lalampahanna jauh kénéh tina réngse kulantaran wanoja nu kasasar éta teu apal nomer ponsél salakina. Inyana ogé ninggalkeun ponsélna dina jero kantong nu aya dina jero mobil. Wartawan lokal geus nelepon ponsel Amnuay leuwih ti 20 kali, ngan taya nu ngangkat. Dina waktu éta, pulisi ogé usaha ngontak dulurna. Amnuay hariwang mun inyana teu bisa ngontak salaki ataunapi kulawargana, inyana kudu nukeurkeun kangkalung emasna ku duit pikeun di jalan.
Numutkeun Thailand Post English nu dikutip New York Post, kakara dina waktu 08.00 isuk, pulisi tungtungna laksana manggih salaki Amnuay nu keur linglung, nu harita geus nyupiran jauh ka provinsi Korat nu jarakna 159,6 km. Leupas tina lalampahan tukang pohona nu luar biasa, Boontom nyebutkeun maranéhna teu guntreng basa inyana ngajemput pamajikannana. Inyana ngungkabkeun yén inyana jeung pamajikan geus rumah tangga salila 27 taun jeung geus boga anak nu umurna 26 taun.
Ceuk Boontom, sanggeus sadar yén inyana teu kahaja ninggalkeun pamajikannana, lalaki éta gura-giru balik ka Kabin Buri pikeun ngajemput pasangannana. Basa ditanya kumaha inyana bisa nyupiran sajauh éta sabari teu merhatikan teu hadirna pamajikannana, Boontom nyarita yén inyana nyangka pamajikannana aya di korsi tukang jeung saré sajajalan. Inyana geus ménta hampura ka pamajikanna basa papanggih deui.
Sumber: internasional.sindonews.com
Foto: canva.com
