WISATA mah teu salilana kudu ka nu mahal. Nu penting matak sugema. Tah, Taman Batu Padalarang contona atawa nu sok pada nyebut Stone Garden di Citatah Kabupatén Bandung Barat, teu kaasup tempat wisata mahal. Ngan, nu kudu disiapkeun mah méntal fisik anu kuat, jeung alat keur popotrétan. ***
Nu épés méér mah, teu kudu ulin ka Taman Batu anu perenahna aya di liliwatan jalan propinsi antara Padalarang jeung Cianjur téa. Sabab lian ti kudu kuat nanjakna, dina usum halodo hawa di sabudeureun éta tempat wisata alam téh kacida panasna. Tempat keur ngiuhan ukur aya saung anu henteu sabaraha loba, atawa upama embung kasorot panonpoé mah bisa cicing tukangeun batu anu gedé jeung luhur.
Kitu deui di jalan saméméh asup ka tempat wisatana ogé sakapeung kawas nu dilimpudan ku halimun. Padahal, saenyana mah, éta téh haseup jeung kebul ti pabrik pangolahan batu kapur anu ngajajar di sapaparat jalan.
Ari keur anu resep ulin saba alam, kaayaan alam kawas kitu téh, teu jadi hahalang. Buktina, najan henteu abrul-abrulan siga ka tempat wisata séjénna, nu daratang ka dinya téh teu kurang-kurang, pangpangna mah barudak ngora.
Nurutkeun sababaraha sumber, Stones Garden mimiti ramé jadi obrolan nu mikaresep wisata murni alam téh taun 2014 katompérnakeun. Tah, ti harita ieu tempat téh angger jadi salah sahiji pangjugjugan wisatawan.
Teu aneh, alam nu jadi tempat pangulinan téh mawa barokah. Apan, warung-warung gé rampage, najan can ditata sakumaha mistina. Kitu deui ti mimiti péngkolan jalan propinsi ka Stone Garden can saperti jalan umumna nu brasna ka tempat wisata. Padahal éta tempat téh henteu jauh ti jalan propinsi. Teuing pédah kagiridig waé ku kandaraan gedé kitu téh, sabab jajalaneun téh aya sababaraha pabrik anu ngakutan batu kapur (apu) ampir unggal poé.
Ari geus nepi ka nu dituju mah, sagala bangbaluh di jalanna téh bakal akaubaran. Pamandangan di sabudeureun éta témpat kacida éndahna. Batu-batu anu ukuranana ruparupa kawas meunang nyusun jadi pangbeberah hate nu nyaraba ka lebah dinya.
Najan Murah tapi Méwah
Saluyu jeung ngaranna, amparan batu anu rupa-rupa ukuran jeung wangunna téh bakal karasa nengtremkeun haté anu sakaligus beuki nambahan rasa iman ka nu Nyiptakeunana. Wisatawan sakapeung moal percaya mun harita keur aya di Padalarang, komo di Bandung mah. Sabab batu-batu anu cenah ngandung formasi matématis téh bener-bener éndah.
Bisa kitu ceuk salah saurang patugas parkir anu asli urang sabudeur tempat wisata, cenah baheulana pisan akibat tina prosés ayana situ di jaman purba. Nu jelas ceuk sababaraha bahasan dina internét, pamandangan Taman Batu atawa Stone Garden Padalarang téh kawas di Christmas Island Australia atawa lamun dina pilem mah siga tempat anu nyaritakeun di planét séjén.
Taman Batu Padalarang anu peresisna di luhur punclut Guha Pawon, aya di Kampung Girimulya, Désa Gunung Masigit Kacamatan Cipatat Kabupatén Bandung Barat téh upama ditempuh ti puseur kota Bandung kurang leuwih 29 km. Bisa ngagunakeun beus umum jurusan Cianjur atawa Sukabumi ti terminal Leuwipanjang. Upama tumpak motor ngaliwat heula ka Cimahi, Padalarang, Situ Cibiruy kakara nepi ka nu dituju. Ulah sieun sasab jaman kiwari mah, dina henteu apal gé wisatawan tinggal muka Google Maps dina android, Stone Garden bakal kapanggih kalawan gampang.
Masih di sabudeur Stone Garden, aya ogé Indian Camp. Ngan anu ngokolakeunana béda cenah mah. Di dinya mah aya jambatan gantung anu henteu éléh éndah ku Stone Garden. Harga asupna ukur lima rébu saurangna. Ditambah mayar ongkos parkir anu kadang keur samotor téh bisa tilu nepi ka lima rébu.
Stone Garden jeung Indian Camp anu lawang asupna mah sarua, bukana ti isuk-isuk nepi ka jam 5 burit. Usahakeun ulah ngaleuwihan waktu nu geus ditangtukeun pédah resep kénéh. Sabab mun geus burit pisan mah bakal loba monyét anu puluhan mungkin ratusan jumlahna laleumpang di jajalaneun rék ngampih ka tempatna masing-masing tingtérékél ka lamping gunung.
Upama panasaran, hadé buktikeun wé langsung. Henteu kudu bebekelan réa-réa teuing, sabab Stone Garden Citatah Padalarang kaasupna wisata murah tapi méwah. Nu kudu disiapkeun mah, méntal fisik anu kuat, jeung alat keur popotrétan. Asal bener ‘angel’ potona, hasilna geus tangtu bakal nyugemakeun. *** (éép/énsa)
Sumber:
- Rizal; Henteu asa keur aya di Padalarang. (éép nr)
- Stoné Garden; Pangjujugan para rumaja. (nét)
- Rizal; karasa béda jeung tempat wisata séjénna. (éép nr)
- Taman Batu Padalarang; Kudu nyiapkeun méntal jeung fisik anu kuat. (nét)
