SAHA budak ngora nu teu wanoh jeung Youtuber Aya Ibrahim? Rupa-rupa kontén social experiment nu dipidangkeun ku Aya dipikaresep pisan, jeung mawa inyana ka jajaran Youtuber papan atas, ku subscriber ampir tilu juta urang.
Dina Kemis (8/12), Aya mucunghul di kantor Nyundayu.com nu ngahiji jeung tempat nongkrong barudak ngora, Kampring, di Jalan Maskumambang 39 Turangga Bandung. Teu ngan sajam dua jam, tapi datang ti jam 10.00 isuk nepika bubaranna di jam 22.00.
Nanaonan waé nya 12 jam di dinya?
Pas ditalungtik, inyana keur kolaborasi jeung dua Youtuber kerén lianna: Zan Films jeung Agogo Violin. Kadua ngaran nu di tungtung éta oge miboga subscriber nu teu sambarangan, di luhur tilu jutaan. Maranéhna hadir babarengan sajumlah kontén kréator séjénna, jeung minuhan rohangan Kampring.
“Abdi ka Kampring kanggo kolab sareng sababaraha réncang. Saleresna abdi ogé kantos ka dieu kanggo nongkrong. Tempatna kerén pisan, tuangeuna raos, mirah, nonoman Bandung mah wajib geura ameng ka dieu,” pokna.
Inyana nampik yén kolaborasi bakal nurukeun niléy saurang Youtuber. “Kolab malah janten jalan pisan kanggo ngengingkeun subscriber anyar, kulantaran urang pan babagi nu nongton. Ayeuna jaman kolaborasi, sanés kompetisi. Tambih sering urang kolaborasi, poténsi nambihna jaringan nya tambih ageung,” ceuk Aya nu sorana mun keur ngaji, bisa niiskeun haté.
Aya nyaritakeun, akun Youtubena kakara dijieun dina tilu taun. Mimitina ngan nyobaan nyieun social experiment, nu diadaptasi tina pintonan ti luar negri. Karya munggaranna nyaéta ngeunaan néangan jelema nu jujur di tengah karaméan. Inyana muragkeun duit basa keur lari di Gasibu, jeung bakal méré hadiah ka saha waé nu malikkeun duit éta.
“Kapungkur mah damel nyalira, abdi aktorna, kaméra nganggo standing, teu acan tiasa nga-hire cameraman. Mung alhamdulillah, kadieunakeun, kontén-kontén abdi seueur dipikaresep. Nu booming mah nalika nga-baper-an janda sémok ku cara abdi ngamén di payuneunnana. Ti dinya, subscriber teras ngaronjat, sareng abdi gé nyobi kanggo langkung profésional,” jelas Aya nutup obrolan.**
Éditor: Dadan Hendaya
Foto: instagram.com/aya_ibrahim04
