BANDUNG (NYUNDAYU). – Pamaréntah geus ngarancang tilu pangwangunan flyover atawa jalan layang deui di Kota Bandung. Tilu flyover éta nyaéta jambatan layang Jalan Soekarno Hatta – Buahbatu, Jalan Abdurahman Saleh – Garuda atawa kawasan Nurtanio ti anggaran Kamentrian PUPR, jeung Ciroyom nu sumberna ti Kemenhub.
“Buahbatu pangayaan lahanna ku Pémprov Jabar, jeung Nurtanio taun ieu pembebasan lahan. Ieu nuju appraisal (panilaian) sareng koordinasi Pémkot Bandung kanggo ngaénggalkeun penlok (penetapan lokasi),” ceuk Kepala Satuan Kerja Pelaksanaan Jalan Nasional (PJN) WIlayah IV Provinsi Jabar Kementerian PUPR Dedy Haryadi sanggeus datang ka Bandung Menjawab di Taman Sejarah, Rebo (5/10/2022).
Ceuk Dedy, pangwangunan flyover Nurtanio bakal leuwih diheulakeun tibatan Buahbatu. Sabab, pangwangunan flyover Buahbatu nungguan kénéh pangembangan ti Pémprov Jabar.
Sagigiren éta, pamaréntah geus nyiapkeun duit santunan pikeun warga nu keuna dampak pangwangunan flyover Nurtanio. “Nurtanio, artos santunan disiapkeun. Januari (2023) tiasa dibayar saatos éta ténder sareng padamelannana.” ceuk Dedy.
Dedy nyatakeun sanggeus mayar duit santunan rampung, prosés lélang tuluy dilaksanakeun. Pangwangunan ditargétkeun bakal dipigawé bulan Méi 2023.
“Éstimasi kuartal kadua 2024 (réngsé padamelan). Janten, 14 sasih padamelan palaksanaannana.” ceuk Dedy
“Ieu upaya mayunan kamacétan sareng ngabantos percepatan KCIC (Kereta Cepat Indonesia China). Upami parantos operasi, ieu tiasa janten feeder ti Padalarang ka Cileunyi.” ceuk Dedy nambahkeun.
Ceuk Dedy, flyover Nurtanio bakal ngaliwatan rél karéta api ti Jalan Abdurahman Saleh-Garuda. “Nurtanio total palaksanaananna 937 méter. Mung, panjang konstruksi flyover 210 méteran. Janten, kinten-kinten sakitar Rp176 miliar.” ceuk Dedy.
Sagigiren éta, hiji flyover séjénna nu dirancang nyaéta Ciroyom. Jembatan layang atawa Flyover Ciroyom bakal diwangun pikeun ngarojong proyék Kereta Cepat Jakarta-Bandung (KCJB).
Saméméhna, Sékda Kota Bandung Ema Sumarna bareng sababaraha pajabat ti Direktorat Jenderal Perkeretaapian (DJKA) geus ninjau rarancang pangwangunan flyover Ciroyom, Salasa (15/2). Dampakna, ratusan kios nepika padumukan warga nu aya di sisi bantaran rél karéta api dipastikeun bakal digusur ku proyék éta.
“Ningali tina targétna, ieu (flyover) kedah jalan taun ieu. Ku kituna ayeuna urang sadaya kedah optimal dina sosialisasi sareng komunikasi ka masarakat, kanggo masarakat nu cicing di ditu baris didata heula,” ceuk Ema.
Numutkeun rarancangna, Flyover Ciroyom bakal méakeun lahan sakitar 10 rébu méter pasagi. Flyover éta bakal manjang sapanjang 700 méter di luhureun Jalan Arjuna mimiti ti Jalan Subadyo, terus muter ka arah Kidul, pernahna ka Jalan Ciroyom, Kota Bandung.
“Aya sababaraha aréa nu kedah dibébaskeun lahanna. Seueur masarakat nu gaduh aktivitas usaha, aya ogé bumi-bumi wargi. Ieu kedah dipastikeun heula skéma rélokasina sapertos kumaha. Ulah dugika masarakat éta dirugikeun.” ceuk Ema.**
Sumber: detik.com/Sudirman Wamad
Foto: finance.detik.com
