BANDUNG (NYUNDAYU), – Padumukan élit di daérah Pasteur Kota Bandung, apéktéh teu weléh jauh tina masalah. Faktana, jalan di bagéan kidul Kompléks Istana Regency remen katerap ku banjir, mun keur hujan. Terus proyék pikeun ngalegaan gorong-gorong dipigawé, ngan warga protés, kulantaran dianggap teu ngabéréskeun masalah.
“Urang sadayana parantos ngalaporkeun sacara resmi masalah ieu ka Balai Besar Wilayah Sungai (BBWS) Citarum ti tanggal 10 Oktober kamari, namung dugika ayeuna teu acan aya tim ti aranjeunna nu turun,” ceuk tokoh warga satempat, Yoséf Yulia, ka media, Senén (21/11).
Prédiksi ti Yoséf nu ngawakilan sawatara warga, aya nu salah dina parancanaan atanapi palaksanaan proyék ieu. “Abdi héran ku palebaran gorong-gorong ieu. Pami diperhatoskeun, luhurna urang sareng komplék TNI AU di pengker éta sami, janten kanggo naon diwangun gorong-gorong énggal, pami cai ogé tetep teu ngalir kaluar,” tandesna.
Numutkeun anjeunna, proyék pangungkulan banjir ieu teu asup di akal. Kulantaran basa gorong-gorong di Blok E dilegaan, walungan di Blok F kalahka ditutup ku alesan pikeun lahan parkir. Ditutupna jalur walungan di Blok F éta ogé teu aya kasapukan ti warga, jeung ayeuna keur aya dina pamariksaan ti patugas Pemkot Bandung.
Inyana miharep BBWS geura ngabantuan, kulantaran masalah ieu lain wewengkon tugas Pemkot Bandung atanapi Pemprov Jabar. “Abdi hawatos pami lami teuing, warga nu kadampak banjir, tambih lami ogé ngaraoskeunna. Urang sadaya leres-leres ngantosan BBWS saénggalna turun ka dieu,” pokna.**
Éditor: Dadan Hendaya
Foto: Istiméwa
