BANDUNG (NYUNDAYU) – Gubernur Jawa Barat, Ridwan Kamil mastikeun harga barang kabutuhan poko masih stabil, sanajan aya kanaékkan harga bahan bakar minyak (BBM).
Kapastian éta téh kaluar satutas anjeunna ngadatangan Pasar Tradisional Balubur Town Square (Baltos), Kota Bandung, Senén (12/9/2022).
“Dinten ayeuna abdi ngamonitor, sacara umum teu aya kanaékkan anu signifikan tina BBM,” ceuk Emil, panggilan akrabna.
Sanajan kitu, aya sababaraha harga sembako anu naék, salah sahijina lalaukan. Numutkeun anjeunna, harga lauk téh naék tapi teu ngaronjat teuing.
“Anu kapangaruh ku naékna BBM téh mung lalaukan. Lauk anu tadina Rp20.000 diical janten Rp26.000 basa ditaros leres aya pangaruh saatos BBM.” pokna.
Sedengkeun harga céngék geus stabil deui sanajan tacan ka titik harga normal. Ceuk anjeunna harga céngék kungsi naék disababkeun ku pasokan anu minim, lain disababkeun ku imbas tina naékna harga BBM.
“Anu sanés éta disababkeun ku suplai sanés disababkeun ku BBM nyaéta céngék atos turun alhamdulillah, tapi teu acan kana harga normal. Ieu masih hubunganna sareng kanaékkan suplai,” pokna deui.
Basa ngamonitor Pasar Baltos, Emil kungsi ngobrol jeung padagang daging. Ceuk manéhna aya fénoména unik, nyaéta anu meuli daging hayam atawa sapi jadi ngurangan.
“Fénoména anu menarik nyaéta anu mésér daging janten ngirangan, saur padagang hayam téh sanajan hargana atos normal sareng padagang daging sapi hargana henteu aya masalah tapi saur padagang mah jumlah anu mésérna ngirangan.” ceuk Emil.
Salian ti éta, aya ogé ukuran tahu anu mimiti ngaleutikan kusabab héséna néangan kedelé. Cenah mah, hal éta téh fénoména anu bakal kajadian di sakuliah dunya.
“Teras adaptasi ku langkana kedelé. Fénoména menarik tahuna janten langsing sareng teu sémok deui, ayeuna di harga 500. Fénoména ngaalitannana produk ieu bakal kajantenan di sakuliah dunya.” pokna.
“Janten ulah rewas kin produk-produk supermarket anu biasana sajengkal, jol ngaalitan. Éta bagian tina adaptasi,” pokna deui.
Éditor: Rizal Fadillah
Sumber: bandungraya.inews.id
Foto: beritakbb.pikiran-rakyat.com
