BANDUNG (NYUNDAYU). – Dinas Perhubungan (Dishub) Kota Bandung babarengan jeung organisasi kendaraan daerah sapuk naékkeun tarif panumpang angkutan umum.
Pangaluyuan éta dumasar kana naékna harga Bahan Bakar Minyak (BBM) subsidi sababaraha waktu katukang.
Ceuk Dadang Darmawan, Kepala Dinas Perhubungan (Dishub) Kota Bandung, naékna téh Rp1.000 pikeun sakabéh trayék angkutan umum di Kota Bandung.
“Alhamdulillah atos sapuk angkutan kota di Bandung naék janten sarébu rupia tina tarif lami. Ieu dumasar kana hasil étangan sasarengan tina komponén naékna BBM tina suku cadang sareng personel ogé,” ceuk Dadang, Rebo (7/9/2022).
Saméméhna, Dishub Kota Bandung ngagelar rapat koordinasi pakait jeung penyesuaian tarif angkutan umum kana naékna BBM, Salasa 6 Séptémber 2022 énjing.
Hadir dina rapat koordinasi éta Satlantas Polrestabes Bandung, DPC Organda Kota Bandung, BLUD UPTD Angkutan, Perum Damri Cabang Bandung, Kobanter Baru, Kobutri, Kopamas, SPTI Kota Bandung.
Dadang ogé nambahkeun, tarif angkutan umum di Kota Bandung diitung rata atawa sarua ku jauh deukeutna.
“Jarak pangcaketna téh rute Mengger – Abdul Muis, anu asalna Rp2.900 naék janten Rp3.900. Sedengkeun rute pangtebihna nyaéta trayék Margahayu – Lédeng, mimiti Rp4.500 ayeuna janten Rp5.500,” pokna
Salian éta, anjeunna ogé nyebutkeun tarif angkutan umum di Kota Bandung tacan diropéa ti taun 2016.
Kasapukan ieu bakal ditepikeun ka Wali Kota Bandung, Yana Mulyana pikeun engkéna dijieun Ketetapan Wali Kota. Dadang ngahimbau ka para sopir jeung nu boga usaha angkutan umum kudu sabar. Hartina, sopir jeung pangusaha angkutan umum tong miheulaan naékkeun tarif angkutan umum.
“Urang sadaya bakal ngadugikeun usulan ieu kanggo janten kaputusan wali kota,” pokna
Pakait prosésna, ningali kana pangalaman naékna tarif nu sateuacanna, Dadang ngaprédiksi prosésna lumangsung moal leuwih ti 3 poé.
Sagigireun éta, Dadang nyebutkeun ayeuna ieu moda transportasi naungan Pemkot Bandung siga Trans Métro Bandung (TMB) diusahakeun angger ku tarif baheula.
Lamun pikeun mangkas biaya operasional, penyesuaian TMB dilarapkeun dina aspék ritase.
“Misalna hiji koridor mimitina 8 rit, saatos penyesuaian ieu robih janten 6 rit. Merhétangkeun tina pick hour-na,” ceuk Dadang.
Anjeunna nyebut skéma ieu dilarapkeun ku prosés évaliasi, “Urang sadaya nyobi bertahan heula ku tarif nu lami. Hasilna bakal ditingali saatos évaluasi,” ceuk Dadang. (*)
Editor : Abdul Basir
Sumber: bandungraya.inews.id
Foto: commons.wikimedia.org
