KABUPATÉN Purwakarta ayeuna geus jadi déstinasi wisata nu dipikawanoh ku para wisatawan ti sakuliah Jawa Barat. Loba pisan destinasi wisata nu bisa dipaluruh ku urang saréréa mun hayang ngaleupaskeun stréss tina pagawéan. Loba pisan moda transportasi nu bisa paké sangkan bisa ka Purwakarta. Bisa naék travel, maké karéta api atanapi liwat jalan tol mun boga kandaraan, ka Purwakarta ayeuna mah geus teu hésé siga baheula.
Tapi naon waé nu ku urang bisa dijugjug mun ka Purwakarta?
Purwakarta ti baheula geus kakoncara jadi séntra kadaharan khas satempat, nyaéta Saté Maranggi. Di Purwakarta, loba pisan tempat wisata nu ngajual Saté Maranggi salaku jualan utamana. Naon ari Saté Maranggi teh? Beda jeung olahan saté nu séjénna, Saté Maranggi maké daging sapi ngora, nu satacan dibeuleum, si dagingna téh dimarinasi heula ku rempah khas. Sanggeus bungbuna nyerep kana daging, kakara dibeuleum. Pidangan saté ieu ogé teu jiga saté nu lianna nu maké bungbu su’uk, Saté Maranggi ngan maké kecap nu digalo bawang beureum, cabe beureum, tomat jeung céngék.
Racikan éta ngahasilkeun rasa nu moal bisa dipopohokeun ku rata-rata nu geus ngarasaan Saté Maranggi. Gurih amis bungbu jeung cakial daging nyieun sénsasi deudeuieun, komo mun ngahuapna dibarengan ku sangu timbel atanapi ketan beuleum nu biasana disadiakeun ku nu dagangna.
Di Purwakarta, aya loba pisan nu ngajual Saté Maranggi ku rupa-rupa ngaran. Ngan sangkan teu lieur milih mana, ieu 5 tempat nu kakoncara nyadiakeun Saté Maranggi:
1. Kampung Maranggi
Kampung Maranggi nyaéta hiji tempat husus pikeun nu ngajual saté nu diadegkeun ku Pamaréntah Kabupatén Purwakarta di taun 1994. Tempat éta miboga tujuan sangkan kulinér khas Purwakarta ieu dipikawanoh sacara luas nu tungtungna bisa ngabantu usaha masarakat sakurilingna. Tempatna aya di gigireun Stasiun Karéta Api Pléréd, jadi cocok pisan pikeun saha waé nu ngajugjug ka Purwakartana naék karéta api.
Jam operasionalna nyaéta ti subuh jam 04.30 nepika tengah peuting. Aya oge nu bukana 24 jam, gumantung ka tukang dagangna séwang-séwang. Harga Saté Maranggina nyaéta Rp2.000 satusukna.
Nu unik di dieu mah aya dina cara ngahargakeun saténa. Unggal mun geus bérés, urang dipénta ngitung sabaraha biting tilas saté nu didahar. Unggal biting éta dikalikeun Rp2.000. Jadi tong hariwang kudu ngodok saku jero-jero mun jajan di Kampoeng Maranggi mah.
2. Saté Maranggi Hj. Yetty
Mun kabeneran ulin ka Purwakarta tapi teu nganjang ka Saté Maranggi Hj. Yetty, asa kurang afdol sigana. Ménu utamana nyaéta Saté Maranggi jeung Es Kalapa Ngora. Salian ti éta, aya oge ménu nu séjén, siga guramé beuleum, sop iga, sayur haseum, loték, sangu tutug oncom, jeung sajabana.
Pilihan saténa oge rupa-rupa. Aya saté hayam, saté sapi jeung saté domba, nu dihidangkeun jeung sambel kécap. Tapi ati-ati pikeun nu tara biasa mah, kulantaran sambelna éta lada pisan.
Lokasi Saté Maranggi Hj. Yetti aya di Jl. Raya CIbungur, Bungursari, Purwakarta. Hargana Rp4.000 satusukna. Buka ti jam 07.30 nepika jam 21.00.
3. Saté Maranggi Abah Usé
Salah sahiji tempat Saté Maranggi nu tenar jeung loba ditéang ku para wisatawan mun ka Purwakarta nyaéta Saté Maranggi Abah Usé. Saté Maranggi Abah Usé éta teu ngan dipikaapal ku wisatawan luar kota, tapi loba urang Purwakarta ogé nu resepeun.
Saté Maranggi éta kakoncara kulantaran ku hipuna jeung ngeunahna bungbu nu napel dina daging. Dijamin pikeun nu dahar jadi deudeuieun. Menu nu disadiakeun teu ngan saté wungkul. Aya oge karédok, sop daging, és kalapa ngora, jeung nu séjénna.
Mun kadieu, kudu nyobaan sop iga kuah beningna. Pasti deudeuieun.
Lokasi aya di Jl. Terusan Kaptén Halim no. 105 Purwakarta. Buka ti jam 08.00 nepika jam 17.00. Hargana Rp2.000 satusuk.
4. Saté Maranggi Saung Nyumput
Saté Maranggi nu kudu dicobaan saterusna nyaéta Saté Maranggi Saung Nyumput. Saluyu jeung ngaranna, di dieu urang bisa ngarasakeun nikmatnya Saté Maranggi di saung dibarengan ku téténjoan nu nyegerkeun panon. Di hareupeun saung tempat dahar pangunjung aya balong nu nyieun suasana jadi tenang jeung merenah.
Saté Maranggi Saung Nyumput dirékomendasikeun pisan pikeun nu keur liburan ka Purwakarta jeung kulawarga. Tempatna nu lega, lokasina nu genah jeung gampang ditéang. Rasana? Teu kudu ditanya, pastina nikmat jeung nyugemakeun.
Alamatna aya di Jl. Raya Anjun-Plered, Purwakarta, buka ti jam 09.00 nepika 21.00. Hargana kahontal, teu mahal-mahal teuing, nyaéta Rp2.000 satusukna.
Tah éta 4 tempat Saté Maranggi di Purwakarta nu bisa dijadikeun réferénsi. Sanajan Saté Maranggi geus aya di sababaraha kota, utamana di tempat urang cicing. Tapi teu salah lamun urang keur kabeneran ka Purwakarta, cobaan kumaha rasa oténtik Saté Maranggi di kota asalna.
