BANDUNG (NYUNDAYU). – Faktor umur teu ngahalangan para alumni SMAN 3 Bandung pikeun ngadonorkeun getihna. Buktina, basa Ikatan Alumni (Ikasma 3) babarengan jeung Relawan Baik ngagelar donor darah jeung check up kaséhatan gratis, puluhan lansia ngarilu datang ka SMAN 3 Bandung, Jl. Belitung (2/10).
Harry Poernomo (70 taun) angkatan taun ’71 ngaku geus 92 kali ngadonorkeun getihna. Inyana geus ngarasakeun mangpaat donor darah pikeun kaséhatan awakna. Sagigireun éta, numutkeun A. Tarman (65 taun), awakna sok karasa leuwih seger unggal beres donor.
Alumni pangkolotna, Rahmat Faqih (77 taun) pikeun taun ieu teu bisa deui ngadonor, kulantaran faktor umur. Inyana datang ngan saukur keur mariksa kaséhatan rutin. Ayeuna, inyana tetep rutin sasapédahan keur ngajaga awak ambéh tetep seger.
Numutkeun Ketua Relawan Baik, Angga P. Requandi nu ogé anggota Ikasma, donor darah nu digelar ku manéhna, sok rutin diayakeun unggal tilu bulan sakali.
“Kagiatan sapertos donor darah sareng cék kaséhatan gratis ieu saé pisan sareng ngabantos masarakat. Mugia sumanget kanggo midamel kasaéan ieu nyebar ka sakuliah nagri, dugika Indonesia janten langkung saé,” pokna.
Hal nu sarua diungkabkeun ku pupuhu panitia kagiatan, nyaéta Arya Anandika, “Hayu urang midamel kasaéan saalit naon ogé, kumargi tiasa masihan dampak nu ageung kanggo masarakat nu meryogikeunna,” tandesna.
Arya ngajak alumni SMAN 3 Bandung jeung umumna ka masarakat pikeun siap ngadonorkeun getihna, kulantaran sakeclak getih urang bisa nyalametkeun hirup loba jelema.**
Éditor: Dadan Hendaya
