BANDUNG (NYUNDAYU). – Kaulinan kakapalan kertas nyaéta kaulinan basajan nu ngeusi kahirupan jaman keur leutik. Tapi, sabenerna kaulinan éta geus boga komunitas nu cukup diaténsi di dunya. Malah mah nepika aya catetan rékor dunya.
Aya trio nu mikaresep kakapalan kertas di Korea Selatan nyangking rékor dunya Guinness World Record dina jarak penerbangan pangjauhna. Kakapalan hasil tilepan kertas tilu urang éta laksana hiber sajauh 77 méter. Kakapalan ieu hiber ampir sapanjang lapang méngbal.
Kakapalan kertas éta dirancang ku Chee Yie Jian ti Malaysia, ditilep ku Shin Moo Joon jeung diapungkeun ku Kim Kyu Tae, duanana ti Korsel.
“Abdi bungah pisan basa urang sadaya ahirna mecahkeun rékor resmi éta, abdi ngémutan urang tiluan kénging hasil nu saé pisan tina kolaborasi nu inténs.” Ceuk Shin Moo Joon basa diwawancara ku Guiness World Record di Daegu, Gyeongsangbuk-do, Korea Selatan.
Kim ngapungkeun kakapalan éta dalapan kali, ku apungan pangalusna ngahontal jarak 77 méter. Apungan éta ngaleuwihan rékor dunya Guinness World Record ku pangapungan pangjauhna ti kakapalan kertas quarterback Joe Ayoob jeung désainer kakapalan kertas John M. Collins, nu ngahontal jarak 68,9 méter ditaun 2012.
“Désain abdi ditambihan modifikasi jangjang ku Shin sareng ‘leungeun rokét’ ku Kim téh janten kombinasi nu unggul, abdi teu hariwang,” ceuk Chee Yie Jian ka Guinness World Records kawas nu dikutip ti UPI, Sabtu (21/5/2022).
Cheee ngabentuk “Tim Shin Kim Chee” sanggeus usaha taun 2019 pikeun mecahkeun rékor dunya gagal. Chee teu hadir pikeun usaha mecahkeun rékor, jeung tacan kungsi papanggih jeung dua lalaki séjénna sacara langsung, tapi manéhna jeung Shin geus koréspondénsi salila mangtaun-taun.
“Komunitas kakapalan kertas mah alit mung ngadunya, ku sabab sadaya jalmi silih wawuh sacara online.” ceuk Chee.
“Abdi atos terang Shin ampir sadékade ayeuna sareng urang ogé teterasan ngadiskusikeun cara-cara anyar kanggo hiber langkung luhur, langkung tebih, sareng langkung lami ngalangkungan email sareng média sosial.” pokna.**
Sumber: international.sindonews.com/Berlianto
