BANDUNG (NYUNDAYU.COM), – PW Muhammadiyah Jabar sono pisan ka saurang Gubernur nu deukeut jeung ormas atanapi umumna masarakat. Hal ieu kungsi dirasakeun Muhammadiyah basa Jabar dipingpin ku Gubernur Ahmad Heryawan (2008-2018).
“Teu mung Muhammadiyahna, ieu dumasar obrolan nu mindeng dilakukeun ku seueur ormas, yén urang téh leres-leres mikasono saurang Gubernur nu caket sareng ormas. Ieu fakta nu teu kabantahkeun. Punten pisan kacaket Gubernur sareng ormas éta teu karaos dina periode ieu,” ceuk Sekretaris PW Muhammadiyah Jabar, Dr. H. Iu Rusliana.
Hal ieu ditepikeun ku anjeunna basa jadi panelis Serial Diskusi Pilkada Jabar “Mencari Pemimpin Pilihan Rakyat” nu diinisiasi Jaringan Media Siber Indonesia (JMSI) Jabar, Senén (5/8). Nu ayeuna jadi narsum nyaéta Ketua DPW PKS Jabar Dr. H. Haru Suandharu, nu kasebut-sebut bakal jadi kandidat Gubernur Jabar ti partai éta.
Ngaréspon hal éta, Haru nepikeun aprésiasina kulantaran kader utama PKS jadi salah sahiji rujukan kalaksanaan jadi saurang pamingpin di Jabar. “Kang Aher leres dikenal caket sareng masarakat. Gampil pami warga bade pendak téh, sareng inyana ku soméah pisan pami pacampur sareng ormas,” pokna.
Hal éta, Haru neruskeun, disababkeun Aher ogé tuwuh jeung ngamimitian ti ormas, nyaéta PUI (Persatuan Umat Islam). “Dugika anjeunna ngaraoskeun naon nu dipikahoyong ku ormas. Mung intina nyaéta, naon nu saé ti Kang Aher atanapi Kang Emil (Ridwan Kamil, Red), hayu urang teraskeun,” émbohna.**
Éditor: Dadan Hendaya
