PAUSAHAAN panangkaran lebah klancéng trigona, PT Mahakarya Berkah Madani (MBM), di Parongpong, Lembang jadi salah sahiji pausahaan nu narik minat para peternak lebah ti taun 2019 kamari. Program kamitraanna jadi lolongkrang usaha nu pikabitaeun, komo keur mangsa sasalad Covid-19 mah, wanci madu katémbong jadi kadaharan nu éféktif pikeun ningkatkeun daya tahan awak.
Leuwih ti 10 rébu mitra geus ngagabung, jeung sumebar di sababaraha kota, jiga Cikarang, Banten, Palembang jeung Cirebon. Produk (madu klancéng) nu dihasilkeun pasti kudu ngaliwatan tahapan quality control; mimiti ti ngokola bibit lebah nepika madu nu dihasilkeun, dimonitor ku BPOM. Mitra peternak katarik pikeun ngagabung, kulantaran harga madu klancéng ogé lumayan alus, ku kandungan propolis jeung bee pollen nu luhur, nu mangfaat pikeun kaséhatan awak urang.
Ngan PT MBM ayeuna-ayeuna ieu digugat ku sababaraha mitrana, nu diinisiasi ku Oting Hidayat. Dina gugatan perdata di PN Balé Bandung, Oting nganiléy geus aya wanpréstasi tina perjanjian kemitraan, jeung nungtut pausahaan pikeun mayar karugian Rp1,5 milyar.
Numutkeun pengacara PT MBM Umar Hasan, nyatana Oting dumasar tina temuan audit internal, miboga hubungan jeung manten Manajer Area PT MBM Bandung nu geus dilaporkeun ka pulisi, lantaran nilep duit pausahaan saloba Rp3 milyar. “Oting nyaéta bapana ti manten Manajer MBM, Saeful, nu ayeuna tos jadi tersangka lantaran nilep artos pausahaan. Saeful dibantuan ku Bagian Keuangan, Indah, nu ayeuna ogé jadi tersangka. Modusna, Saeful ngalaporkeun data fiktif mitra, dugika pausahaan nyetorkeun artos ka jalmi nu sanés mitra,” Umar ngajelaskeun.
Teu éta wungkul, émbohna, pausahaan oge dijebol dua kali, lantaran dana ti mitra ditilep jeung teu asup ka pausahaan. “Tah, satutas urang pulisikeun anjeunna, ojol-ojol ramana ngajukeun gugatan perdata. Urang sadaya yakin, gugatan ini dikaluarkeun minangka bagéan tina tawar-menawar kanggo laporan pulisi ka Saeful dicabut. Urang sadaya gaduh bukti pengacara aranjeunna nu nawarkeun gugatan perdata Oting baris dicabut waktos gugatan pidana ka Saeful ogé dicabut,” tandesna.
Umar ogé manglebarkeun aya meedia nu salah nepikeun informasi, nepika PT MBM siga bener-bener ngalakukeun wanpréstasi. Numutkeun anjeunna, penggugat geus upaya ngagiring opini publik nu ngarugikeun klienna. Lantaran dina sababaraha poé ti kaluarna berita éta, geus kajadian aya panurunan produksi, gara-gara aya mitra nu kapangaruhan.
Editor: Dadan Hendaya
