TASIKMALAYA (NYUNDAYU), – Pondok Pasantrén Mujahidin di Dadaha, Kota Tasikmalaya ngagelar Lomba Gema Ramadhan taun 1444 Hijriyah. Runtuyan lomba di antarana aya marawis (hadroh), lomba pidato, jeung baca puisi nu nuansana kaagamaan, mahluikiyam, jeung yalawaton.
Pingpinan Pondok Pasantrén KH. Yusuf Bani nétélakeun yén lomba éta merebutkeun piala tokoh Jabar H. Yod Mintaraga, jeung piala tokoh Kota Tasik Muhammad Yusuf.
Pasanggiri ieu digelar ti poé Saptu (1/4) nu dihadiran ku anggota DPRD Jabar H. Yod Mintaraga, mantan walikota nu ogé Ketua Partai Golkar Tasikmalaya H. Muhammad Yusuf, Muspika Kacamatan Tamansari, sarta para pingpinan ponpés sa-Tasikmalaya.
Yod nu ogé Ketua SOKSI Jabar ieu nyebutkeun, kagiatan Ramadhan ku rupa nada jeung dakwah di Ponpes Mujahidin Kota Tasikmalaya loba dipikaresep ku kaum milénial, hususna para santri di Kota jeung Kabupatén Tasikmalaya. “Abdi misukur generasi muda langkung caket sareng pasantrén, caket sareng rupa-rupa kagiatan Islami,” pokna.
Numutkeun Wakil Ketua DPD Partai Golkar ieu, mun ditempo dina kacamata Islam kabudayaan kagiatan sarupa éta jadi terapan akal budi cipta karsa jeung rasa nu didasaran ku aqidah. “Sareng ieu téh positif pisan dina ngabentuk karakter manusa hususna dina bermasarakat, berbangsa, sareng bernegara kanggo kaum milénial salaku harepan masa depan nu miboga ahlaqul karimah,” ceuk Yod.
Kagiatan ieu lumangsung tiap taun nu disponsoran ku anggota Fraksi Golkar DPRD Provinsi Jawa Barat H. Yod Mintaraga.**
Éditor: Dadan Hendaya
