Bandung – Warga Kota Bandung pasti geus moal bireuk deui ka Pasar Buku Palasari. Tempatna aya di sapanjang Jalan Palasari, nu geus aya ti taun 1980-an.
Pasar Palasari mangrupakeun tempat anu kasohor pikeun jalma anu raresep maca buku di Kota Bandung. Di tempat éta, aya puluhan toko buku anu nyadiakeun rupa-rupa buku bacaan.
Ti mimiti buku palajaran tingkat SD nepika tingkat universitas. Salian éta, pasar buku Palasari ogé nyadiakeun rupa-rupa novél, komik, jeung majalah.
Ceuk Rizal, salah sahiji padagang buku, para padagang buku éta saméméhna daragang di kawasan Cikapundung. Terus pamaréntah mindahkeun padagang ka lantai 2 gedung pasar di Jalan Palasari.
“Kinten-kinten awal taun 1990-an, pasar éta kahuruan. Para padagang dialihkeun ka lahan samentara, anu kapungkurna téh lahan parkir, ayeuna parantos janten lahan tetep,” ceuk Rizal dilansir tina laman bandung.go.id, Rebo (31/8/2022).
Pas nepi ka kawasan pasar buku, para padagang bakal nyampeurkeun jeung nanyakeun buku naon anu dibutuhkeun. Teu jarang ogé aya padagang anu ngabantuan néangan buku ka padagang séjén.
Salian buku, di Pasar Palasari ogé aya jasa percétakan jeung jasa sampul buku.
“Di dieu mah kumplit sareng kapercaya ti kapungkur, ku sabab abdi ogé tos mindeng mésér di dieu,” ceuk Hanif, salah sahiji nu meuli buku.
Buku anu dijual di dieu ogé lengkep, ti buku anyar nepika buku tilas anu geus langka tapi masih pantes dibaca. Malah mah, buku anu geus henteu dicétak deui.
“Buku anu dipésér ku abdi ogé buku anu atos lami, bukuna ngeunaan téater,” ceuk Hanif
Harga buku-buku di dieu rada murah kusabab lolobana padagang di dieu ngorder bukuna langsung tina penerbitna. Harga buku-buku di dieu ogé masih bisa ditawar.
“Upami sumber bukuna tiasa tina penerbitna langsung, aya ogé tilas. Da di dieu ogé tiasa ical-galeuh,” ceuk Rahmat, salah sahiji padagang buku séjénna.
Kanggo anjeun sadaya nu panasaran jeung aya rencana datang langsung, Pasar Buku Palasari buka unggal poé jam 09.00 – 17.00 WIB.
Sumber: bandungraya.inews.id
Foto: bandung.go.id
