BANDUNG (NYUNDAYU). – Paméran buku anu dibéré judul Big Bad Wolf Books bakal digelar di Parahyangan Convention, Kota Baru Parahyangan, Padalarang, Kabupatén Bandung Barat (KBB). Kagiatan anu digelar tanggal 2-11 Séptémber 2022 éta, bakal dieusi ku total 35 rébu judul buku.
Tujuan tina kagiatan éta salah sahijina téh pikeun ngarangsang minat baca di kalangan masarakat. Dumasar kana data UNESCO, budaya maca di Indonésia ngan 0.001%, hartina tina 1.000 urang Indonésia ngan aya hiji jalma anu rajin maca.
“Saatos vakum lantaran pandemi COVID-19, bazar buku internasional Big Bad Wolf digelar deui ku ngahadirkeun kira-kira 35 rébu judul buku anyar,” ceuk Présidén Diréktur Big Bad Wolf Books, Uli Silalahi ka wartawan di Padalarang, Senén (29/8/2022).
Uli miboga komitmen, pihakna rék ningkatkeun literasi jeung nyebarkeun budaya resep maca ti leuleutik di Indonésia hususna di Jawa Barat. Dumasar kana indéks literasi digital Indonésia 2021 ti Kamenterian Kominfo, Jawa Barat meunang skor literasi digital 3,47 atawa panggedéna tina 34 provinsi.
“Indikatorna ditingali tina tilu pilar digital, diantarana budaya digital, étika digital sareng kamampuh digital. Ku kituna urang sadaya ngarojong diwujudkeunnana misi Jabar Juara ku literasi,” pokna.
Salian éta, tambahan deui ceuk anjeunna, ngaliwatan paméran éta pihakna ngayakeun aksés buku internasional nu boga kualitas tapi hargana kahontal pikeun sakabéh génré. Sagigireun éta, pikeun nu raresep pisan kana buku bakal aya rupa-rupa kontés anu hadiahna gedé. Salah sahijina hadiah buku satroli nu bisa dibawa balik ku nu meunang.
“Urang sadaya ningali yén maca téh mangrupikeun kagiatan positif anu tiasa dilakukeun di mana waé sareng iraha waé. Malah mah dina kaayaan pandemi COVID-19 rutinitas maca terus lumangsung,” pokna.
Sumber: juaranews.com
Foto: instagram.com/bbwbooks_id
