BANDUNG (NYUNDAYU), – Dékan Fakultas Ilmu dan Téknologi Kebumian Institut Téknologi Bandung, Dr Irwan Meilano, ST MSc ngajelaskeun ngeunaan Sesar Cimandiri nu disebut jadi cukang lantaran lini 5,6 SR, nu ngeundeurkeun Kabupatén Cianjur, Jawa Barat.
Irwan ngajelaskeun Sesar Cimandiri kagolong sesar nu aktif jeung mangrupakeun bidang rekahan nu dibarengan ku ayana éséran, prosés retakan atanapi miboga beulahan.
“Dina sesar ieu aya akumulasi tegangan téktonik nu jadi gaya penerus gempa. Pami ditilik nganggo pendekatan géologi, ogé nunjukkeun hal nu sarupi,” ceuk Irwan Meilano dina katerangan nu ditulis ka Antaranews.com, Salasa (22/11/2022)
Sesar ieu kaasup sumber lini nu indepénden jeung teu kapangaruh ku lini-lini satacanna, nepika aya poténsi lini nu signifikan bakal kajadian kahareupna.
Irwan nyebutkeun urang bisa diajar tina musibah lini magnitude 5,6 SR nu ngaeundeurkeun Cianjur, Jawa Barat.
“Concern utama aya di pamaréntah jeung pemda, kedah aya upaya kanggo mikahartos yén daérah éta aya poténsi lini. Panataan ruang jeung kaidah pangwangunan nu dilakukeun unggal daérah diluyukeun sareng struktur géologina sareng tebihna ti sumber lini,” pokna.
Salian ti éta, émboh Irwan, masarakat ogé kudu melék literasi jeung kanyaho yén urang téh cicing di daérah rawan lini, jadi musibah téh bisa dimitigasi.
Inyana nyaritakeun yén mun aya kajadian musibah, aya waktu (golden time) pikeun évakuasi, nyaeta kira-kira ngan 30 menit sanggeus kajadian.
Hal nu bisa dilakukeun sanggeus kajadian musibah nyaéta nyieun tindakan résponsif sagancang-gancangna.
“Urang sadayana kedah diajar ka Jepang dina ngamanfaatkeun golden time éta. Rumah sakit darurat, pangungsian samentara, cai sareng sanitasi nu saé, ngawitan kedah ayeuna disiapkeun. Pami mung fokus kanu tatu, teras teu merhatoskeun hal-hal vital nu kedah disiapkeun, ku kituna jalmi nu salamet ogé tiasa janten korban salajengna,” ungkabna.
Irwan nu ogé Dosén Téknik Géodési dan Géomatika ITB éta miharep tong aya deui korban jiwa jeung sakabeh pihak bisa diajar pikeun ngantisipasi kajadian nu sarupa kahareupna.**
Sumber: mediapublik.id
Foto: arasynews.com
