BANDUNG (NYUNDAYU.COM), – Lamun dibéré amanah jeung kapercayaan ti rahayat Jabar pikeun jadi Gubernur, Ono Surono miboga jangji moal bakal ngajadikeun posisi Wakil Gubernur salaku ban sérep. Kulantaran Wakil Gubernur lain objék palengkep nu ngan dialas atanapi dibéré tugas sakahayang haté Gubernur.
“Abdi gaduh rarancang —pami leres dikobul janten Gubernur Jabar— unggal dinten Jumaah baris dijantenkeun acara ‘Ngariung Bareng Rakyat’, Full dinten Jumaah éta baris abdi hadirkeun sadaya dinas. Satiasana kumaha pasualan nu aya, baris diéksékusi langsung. Taah, Wagub nu baris nangtoskeun saha waé unsur masarakat nu baris pendak sareng abdi dina dinten Jumaah éta,” ceuk kandidiat Gubernur ti PDI Perjuangan éta.
Hal éta diungkabkeun basa inyana jadi narasumber dina serial diskusi pilkada “Mencari Pemimpin Pilihan Rakyat”, nu diinisiasi Jaringan Media Siber Indonesia (JMSI) Jabar jeung PW Muhammadiyah Jabar, Saptu (3/8).
Biantara Ono Surono ogé dibahas ku dua panelis, ahli pulitik Unpad Dr. Firman Manan jeung Sekretaris JMSI Jabar Dadan Hendaya. Serial diskusi ieu geus asup minggu kalima, ku ngahadirkeun kandidat gubernur, bupati jeung walikota nu poténsial. Minggu hareup, diskusi ngararancang baris ngahadirkeun Haru Suandharu, kandidat Gubernur Jabar ti PKS.
Disebutkeun, Wagub baris miboga fungsi niténan jalanna pamaréntahan jeung program pangwangunan. “Kumargi anjeunna kan bagjoang sareng abdi kanggo janten pamingpin di Jabar. Maenya saatos pajoangan laksana, késangna dipikahilap. Komo ngurilingan Jabar éta pasti capé pisan, dugika peryogi jalmi kadua nu ogé énérjik,” tandes anggota komisi IV DPR RI ieu.
Basa ditanya saha nu digadang-gadang pikeun jadi wakilna, Ono sacara diplomatis nyebut, “Pami KIM solid, hartosna di pihak ditu aya Partai Golkar, Gerindra, Démokrat, PAN sareng PSI. Urang di dieu ngabuka lolongkrang sareng calon ti PKB, Nasdem, PPP atanapi PKS. Sadayana tiasa kajantenan, masih cair kénéh.” **
Éditor: Dadan Hendaya
