BANDUNG (NYUNDAYU). – Kajadian Gerakan 30 Séptémber taun 1965 atawa nu leuwih kasohor G30S PKI jadi titik beureum sajarah Républik Indonésia nu nyésakeun trauma nepika ayeuna.
Saeutik ngulas ngeunaan kajadian nu masih loba ninggalkeun mistéri éta Gerakan 30 Séptémber 1965 dilakukeun ku Partai Komunis Indonesia (PKI), nimbulkeun korban di kalangan militér pangkat luhur. Pasasaing antara PKI jeung TNI ngajelang pilprés basa harita nu nyababkeun G30S PKI.
Tujuh jénderal TNI jadi korban dina gerakan éta, nyaéta Jénderal Ahmad Yani, Mayjén R Soeprapto, Mayjén MT Haryono, Mayjén S Parman, Brigjén DI Panjaitan, Brigjén Sutoyo jeung Lettu Pierre A Tendean. Mayit tujuh urang éta kapanggih tanggal 1 Oktober 1965 di daérah kebon karét Lubang Buaya.
Kajadian angkeub éta tetep mangrupakeun bagéan tina lalampahan bangsa Indonésia jeung kudu diinget ku unggal generasi kahareup. Hal éta ogé nu nyababkeun sakelompok nonoman kréatif di Kota Cimahi nyulap témbok kumuh di gang tempat cicing maranéhna jadi média mural gambar 7 jénderal korban G30S PKI nu gelarna Pahlawan Révolusi.
Pernahna di Gang Haji Kodir, Cimindi, Kota Cimahi, mural gambar Jénderal Ahmad Yani, Mayjén R Soeprapto, Mayjén MT Haryono, Mayjén S Parman, Brigjén DI Panjaitan, Brigjén Sutoyo jeung Lettu Pierre A Tendean ngahias témbok imah warga nu méré ijin jadi tempat para nonoman éta nuangkeun kréativitasna. Maranéhna ogé geus ménta ijin saméméh ngagambar.
“Nyaketan miéling G30S PKI, lembur mural Cimindi ieu urang gambar ku sosok 7 pahlawan révolusi salaku média édukasi sareng ngémutan sajarah Indonésia,” ceuk Ivan Effendi (37), salah saurang muralis ka wartawan, Rebo (28/9/2022).
“Prosésna ngagambar mural ieu kinten-kinten 5 dinten ku média mural panjangna 10 méter. Janten dikerjakeun éta ti énjing dugika tabuh 6 sonten,” ceuk Ivan.
Totalitas jeung kapadulian maranéhna ka lingkungan sangkan leuwih alus jeung mikawarna nepika ngaleungitkeun kesan kumuh jeung ngandung nilai seni, sajarah jeung édukasi bisa ditingali ku warga jeung pangandara nu ngaliwat.
“Kanggo biaya urang sadaya muralis swadaya, tapi aya ogé sumbangan tina kapemudaan. Teras aya ogé kéncléng, janten upami nu ngalangkung tapi hoyong nyumbang tiasa ngéncléng. Séép ratusan rébu, henteu dugika jutaan,” ceuk Ivan.
Ivan ngajelaskeun yén maranéhna butuh pisan pangrojong ti pamaréntah pikeun nyadiakeun média anyar nu saluyu sangkan teu dinilai jadi vandalisme. Témbok warga mah lila-lila baris moal nyésa.
“Janten gambar mural ieu saluyu sareng momen, misalna nyaketan G30S PKI ieu urang gambar pahlawan révolusi, nyaketan HUT RI béda konsép gambar deui, janten béda-béda jenis gambarna. Di sapanjang gang atos digambar ogé,” Ceuk Ivan.
Éditor : Whisnu Pradana
Sumber: detik.com
Foto: detik.com, jabar.tribunnews.com
