BANDUNG (NYUNDAYU). – PT. Geo Dipa Energi (Persero) ”Geo Dipa” hadir méré dukungan pinuh kana kagiatan pelepasliaran sapasang Owa Jawa (Hylobates moloch) nu ngaranna Lola jeung Udin tina hasil réhabilitasi Pusat Rehabilitasi Primata Jawa ka habitatna di Cagar Alam Gunung Tilu (CAGT), Jawa Barat, Salasa (6/9/2022).
Kagiatan pelepasliaran Owa Jawa éta mangrupakeun runtuyan program dina miéling Hari Konservasi Alam Nasional 2022 jeung miéling Hari Primata Internasional nu rutin dilaksanakeun ku Direktorat Jenderal Konservasi Sumber Daya Alam dan Ekosistem (KSDAE), Kamentrian LHK ngaliwatan Balai Besar Konservasi Sumber Daya Alam (BBKSDA) Jawa Barat, gawé bareng jeung The Aspinall Foundation (TAF) Indonesia salaku upaya pelestarian primata endemik Jawa nu geus kalaksana suksés salila 12 taun ti taun 2010.
“Dina dinten ieu, BBKSDA Jawa Barat ngaleupasliarkeun sapasang Owa Jawa (Hylobates Moloch) nu namina Lola nu jinisna bikang umur genep taun sareng Udin nu jinisna jalu umur opat taun, duanana mangrupakeun sato kenging ti Garut taun 2018 sareng 2021,” ceuk Kepala BBKSDA Jawa Barat, Irawan Asaad.
Kacatet, saloba 48 individu Owa Jawa geus dileupasliarkeun mimiti taun 2014 ti Pusat Rehabilitasi Primata Jawa (PRPJ) Patuha. Sapasang Owa Jawa, Lola jeung Udin mangrupakeun individu nu ka-49 jeung 50 nu baris dileupasliarkeun di CAGT. Nepika ayeuna, kapantau geus aya 3 orok Owa Jawa nu dilahirkeun di CAGT.
Owa Jawa nyaéta salah sahiji primata éndemik Jawa nu asup kana daftar satwa primata katégori “genting” ku International Union for Conservation of Nature (IUCN). Ayeuna, diprédiksi populasi Owa Jawa di alam ngan kasésa antara 1.000-2.000 individu nu kasebar di wewengkon leuweung konservasi jeung hutan lindung di Jawa Barat jeung sabagéan leutik di Jawa Tengah. Hal éta nu ngajadikeun Owa Jawa spésiés nu paling langka di dunya.
“GeoDipa nyadar pisan kana pentingna ngajaga kalestarian alam, ku kituna urang sadaya ngarojong kagiatan-kagiatan nu pakait sareng konservasi ékosistem sareng lingkungan, contona sapertos nu dilakukeun ayeuna, nyaéta pelepasliaran sapasang Owa Jawa Lola sareng Udin, urang sadayana miharep duanana tiasa adaptasi sareng laksana ngembang biak di habitatna,” ceuk Project Manager Patuha 2, Danang Maulana.
Sumber: bandungraya.inews.id
Foto: en.wikipedia.org
