MOAL bakal aya eureunna lamun ngomongkeun tempat wisata di Bandung. Daérah anu dibéré jujuluk Kota Kembang ieu émang pantes disebut surgana tempat wisata.
Jadi, teu héran lamun dina poé-poé liburan loba wisatawan ti luar daérah anu datang ka Bandung. Sabab, Bandung émang pas pisan dijadikeun déstinasi liburan pendék atawa dina waktu libur panjang.
Ngomongkeun ngeunaan wisata, di kawasan Bandung Barat aya tempat wisata anu merenah dijadikeun déstinasi. Wewengkon Bandung Barat bisa jadi lokasi anu cocok pisan pikeun anu rék ningali sakaligus mikanikmat kaéndahan alam di Bandung.
Salah sahiji tempat anu wajib didatangan ku anjeun nyaéta Curug Layung. Dina Bahasa Indonésia, curug hartina ‘air terjun’.
Curug Layung aya di Désa Kertawangi, Kecamatan Cisarua, Bandung Barat. Anjeun bisa ka lokasi ieu maké kendaraan roda dua atawa roda opat.
Dilansir tina rupa-rupa sumber, Curug Layung aya di kawasan kaki Gunung Tangkuban Perahu nu aya di 1.400m dpl. Jadi, teu héran lamun hawa anu bakal karasa ogé tiis, atawa malah mah pikeun sabagéan jelema jadi sok katirisan.
Ku jangkungna anu ngan 4 méter jeung kaayaan curugna anu umpak-umpakan, nyieun curug éta jadi béda jeung nu séjén. Sanajan kitu, kaéndahannana teu éléh lamun dibandingkeun jeung curug anu biasa. Di tempat ieu, anjeun ogé diizinan ngojay atawa ngan saukur ulin cai. Curug Layung miboga 3 curug anu ngumpak gumantung kumaha luhur jeung lobana cai.
Curug anu kahiji teu pati jangkung jeung teu pati nyéot teuing caina, anjeun bisa ngojay di aréa ieu sabab aya kolam anu leuwih lega ti nu séjénna. Tapi, kudu hati-hati ogé da jero kolamna béda-béda, malah mah aya nu nepika 2 méter.
Kolam nu kadua leuwih cocok lamun dipaké keur ulin cai bareng babaturan atawa kulawarga. Jero kolamna ngan sacangkéng déwasa jeung miboga aliran curug pangleutikna.
Sedengkeun kolam anu panghandapna boga kolam anu manjang, aliran jeung debit cai panggedéna. Anjeun bisa ngarasakeun cérétan cicurug ku cara nangtung pas pisan di handapeun curugna.
Salian ti éta, aréa Curug Layung legana sakitar 10 héktar, teu héran ogé lamun lokasina mindeng dipaké aréa camping.
Ngéndong di tengah leuweung pineus bari dibaturan ku sora alam anu nenangkeun pisan ditambah deui ku tiisna hawa asri mangrupakeun cara anu pas pikeun ngarasakeun kaéndahan alam Curug Layung.
Lain ngan éta hungkul, Curug Layung aya di aréa leuweung pinus anu iuh, jadi nimbulkeun suasana anu éndah, sejuk jeung asri.
Spot foto nu séjén nyaéta kaéndahan tina curug, sanajan kamalir caina teu pati luhur, tapi teu ngurangan kaéndahannana. Kaayaan cai nu beresih jeung hérang, ditambahan ku kaayaan alamna nu alami kénéh karasa lebar mun teu diabadikeun. Salian ti éta, aya oge spot foto pang hadéna nu geus disadiakeun ku pengelola Curug Layung.
Jam operasional Curug Layung buka unggal poé tapi pikeun curugna sorangan mah dibukana mimiti jam 08.00-18.00 WIB, Camping Groundna buka unggal poé 24 jam nonstop. Harga tikét asupna rélatif murah pikeun ngarasakeun kaéndahan curug mah, ngan Rp10.000 saurang.
Lamun rék camping Rp20.000 hungkul. Tikét parkir motor Rp5.000 jeung mobil Rp.10.000/mobil.
éditor : Rizal Fadillah
Sumber: bandungraya.inews.id
Foto: maps.google.com
