PARKIRAN hareupeun kantor Nyundayu.com jeung tempat nongkrong barudak ngora, Kampring, can lila ieu dipinuhan ku mobil-mobil méwah, siga Rubicon, Alphard, BMW jeung sababaraha sédan séjénna. Pas dicék aya naon, apéktéh Youtuber kasohor keur kolaborasi nyieun kontén social experiment.
Salah sahijina nyaéta Zan Films. Enyaaa… akun Zan nyaéta ngaran landian Arifullah Rafsanjani, nonoman kalahiran Lamongan (Jatim), 25 taun katukang. Jelema kadang ngan ningali tungtungna nalika manéhna geus suksés, tapi bajoangna pikeun nepi ka titik ayeuna, teu kahontal ku kalayan gampang.
Inyana kudu paéh poso ti taun 2015 pikeun ngahontal posisi 3,34 juta subscriber Youtube.
Malah tilu taun ngamimitian mah kasebut mangsa keur beurat-beuratna. “Nembé taun 2018 subscriber abdi ngawitan tarik sareng abdi parantos kénging karakter nu pas. Waktor éta, abdi api-api janten nu gélo sareng ngaheureuyan saurang istri,” ceuk Zan basa ngobrol di Kampring Jl. Maskumambang 39 Bandung, Rebo (8/12) kamari.
Jebolan Ilmu Komunikasi UIN Bandung ieu ngamimitian karir youtubena ku nginjeum kaméra. “Janten mung hiji kaméra sareng éta oge nu gaduh réréncangan. Nya ngawitan mah abot pisan, osok ngeblank ogé bade ngadamel kontén naon. Mung ku getén sareng kerja keras, alhamdulilah ayeuna kantun ngarawat sareng ningkatkeun kualitas kontén,” émboh Zan sabari nambahan yén ayeuna mah geus bisa produksi 15 kontén sabulan.
Ayeuna kahirupan mapan geus kahontal dina umur nu rélatif ngora. Mun di awal gawé sorangan, ayeuna geus mampuh miboga pagawé 2 kaméraman, 2 éditor, tim kréatif jeung manajemén, sarta ku alat-alat nu mutahir, nu ngadukung kabutuhan kontén. Ratusan juta sabulan gé ayeuna mah henteu jadi ngan impénan wungkul.
Kabita jadi Youtuber teu?**
Éditor: Dadan Hendaya
Foto: Istiméwa
