BANDUNG (NYUNDAYU.COM), – Salapan poé nyanghareupan pancoblosan, genjlongna katatanagaraan kajadian deui. Déwan Kehormatan Penyelenggara Pemilu (DKPP), Senén nurunkeun sanksi keras jeung panungtung ka Ketua & Anggota KPU RI, dina prosés panarimaan pacalonan Gibran Rakabuming Raka jadi calon wakil présiden.
Basa hal ieu ditanyakeu ka inisiator rélawan Bandung Interactive Hub – Balad Uwa Mahfud (BIM-BUH), Iwan Setiawan, dijawab ku, “Kanggo naon? Teras baris bade kumaha? Tiasa kitu pacalonan Gibran dibatalkeun? Pamohalan. Rombongan sirkus ieu tos kiat pisan ti ngawitan, rupi-rupi trik sareng skénario tos disiapkeun,”
“Sareng ogé pemilu kantun saminggon deui. Tos wé lah ‘lahawla’, urang gaduh kénéh gusti Allah nu Maha Sagalana. Urang tong pegat midua kanggo kasalametan bangsa ieu,” ceuk Iwan, basa ditanya wartawan, di Bandung, Salasa (6/2) isuk.
BIM-BUM ngajak masarakat pikeun ningali sisi positif tina putusan DKPP ieu, nyaéta mawa pesen ka publik, yén émang prosés pacalonanna nyaéta by design ti awal, nu mangrupakeun gabungan masif antara panguasa jeung para petualang pulitik.
“Aranjeunna nyaéta mantan-mantan nu kirang padamelan, nu kapungkur nyempad, ayeuna malik muja. Di kubu éta ogé janten sarang para sandera hukum, cukong-cukong nu bisnisna hoyong langgeng, barisan padengdem nu jagona teu janten nyaprés,” pok Iwan.
Dijelaskeun, kabéhannana jadi jamaah pikeun hiji harepan, nyaéta ngadu nasib jeung ngadu untung, sangkan 5 taun ka hareup dapur maranéhna ngebul kénéh, sukur-sukur aya program dahar siang haratis jeung nginum susu, nu meureun hirupna bisa leuwih irit.
“Tapi abdi mah yakin, saleresna bapa-bapa gegedén éta gaduh kénéh nurani sareng akal nu séhat, sarta percaya kénéh ka ayana ahérat engkin. Kajabi nu tos murtad, misalna ngarobah tata cara shalat nganggo tahiyat 2 ramo, ku fanatik-fanatikna,” émbohna.
Iwan misukur, loba élémen bangsa nu miboga haté kénéh, jeung upaya sangkan pemilu ayeuna ieu bener-bener lumangsung démokratis, jujur jeung adil, kaasup cumeluk ti sababaraha perguruan tinggi nu ngalibatkeun civitas akademika, guru besar jeung mahasiswa.
Sanajan cumeluk ieu ogé katémbong ngan diréspon hampang ku pihak istana jeung malahmah nuduh yén gerakan ieu nyaéta gerakan partisan nu mihak. “Na’udzubillah, pantes wé para guru besar éta ambek sareng kasigeung. Mugia pa jubir ieu dipasihan deui kasadaran yén pungsi kampus nyaéta janten pusat paradaban umat manusa,” tandes Iwan.**
Éditor: Dadan Hendaya
