BANDUNG (NYUNDAYU), – Anggota DPRD Jabar H. Yod Mintaraga nyangking sertifikat pangajén langsung ti Ketua Umum DPP Partai Golkar Airlangga Hartarto, dina acara “Pemantapan Materi Dikpol dan Pelepasan Fungsionaris Partai Golkar Tingkat Provinsi dan Kabupaten/Kota se-Jawa Barat” nu digelar di Hotél Pullman, Bandung, Ahad (9/4).
Nyatana, inyana nyangking pangajén salaku peserta senior panghadéna dina kagiatan Pendidikan Politik nu digelar DPD Partai Golkar Jawa Barat, pikeun nyiapkeun kaderna nu jadi bakal calon législatif dina Pileg 2024 nu datang. Dina taun ieu, umurna geus nincak 72 taun, jeung jadi anggota déwan masa bakti 2019-2024 mangrupakeun periode nu katujuh kalina salaku anggota DPRD ti Fraksi Partai Golkar
Salian ka Yod, Ketum ogé nepikeun sertifikat éta ka wawakil lima angkatan Dikpol, nyaéta Ahmad Hidayat, Fetty Anggraeni, Sri Rahayu, Dian Kencana, Dadang Kalyubi, sarta pamilon pang ngorana Bagja Jaya Wibawa. Kapilihna aranjeunna dumasar kana absénsi kahadiran, niléy pré-tést, post tést jeung panugasan, sarta kaaktifan dina jero kelas.
Basa dikonték media sabérés acara, Yod nyebutkeun, umur teu ngahalangan saha ogé pikeun miboga énérgi nu ngabudal pikeun ilubiung dina sakabéh aktivitas pulitik. “Sapertos ditepikeun Ketua Golkar Jabar Pa Ace Hasan Syadzily, ngiringan Dikpol nyaéta prasyarat janten caleg Golkar. Teu paduli anjeun pajabat, incumbent, pangurus, sadaya wajib ngiringan Dikpol pami palay dicalonkeun ku partai ieu,” teges anggota Dewan ti Dapil Kabupaten-Kota Tasikmalaya ieu.
“Abdi ngiringan sadaya prosés nu janten aturan partai. Komo deui Dikpol ieu leres-leres masihan mangpaat ka unggal caleg, kanggo siap tempur mayunan Pileg kapayun. Urang sadaya dibekelan matéri nu aplikatif kanggo dianggo dina kompetisi sareng kontéstasi pemilu,” ceuk Ketua Depidar SOKSI Jabar ieu.**
Éditor: Dadan Hendaya
