BANDUNG (NYUNDAYU). – Bandarudara Internasional Jawa Barat (BIJB) di Kertajati, Majalengka sabenerna geus dilaunching di taun 2019, nanging geus kitu mati suri. Malah mah bandara pang badagna kadua sanggeus Bandara Cengkareng éta, ayeuna kalahka dijadikeun tempat foto prewedding.
“Saleresna pangwangunan Kertajadi tos luyu sareng Program Nawacita Jokowi, nyaéta ngawangun di pasisian, nguatkeun daérah-daérah sareng désa dina raraga negara kesatuan” ceuk Ketua Jaringan Media Siber Indonesia (JMSI) Pusat, Teguh Santosa, basa jadi keynote speaker dina diskusi “Kupas Tuntas Bandara Kertajati”, Jumaah (9/9) soré.
Diskusi nu digagas JMSI jeung Kadin Jabar éta lumangsung di Gedung Menara Kadin Jabar, Jl. Sukabumi Bandung. Salian ti Teguh, nu jadi keynote speakerna nyaéta Ketua Kadin Jabar Cucu Sutara. Pembicara nu séjénna nyaéta Asisten Perekonomian dan Pembangunan Setda Jabar Taufiq Budi Santoso, Direktur BIJB Muhammad Singgih jeung anggota DPR RI H. Mulyadi.
Cucu Sutara dina arahanna nyebutkeun, Kadin téh mangrupakeun salah sahiji nu ngainisiasi lahirna BIJB Kertajadi, jadi kusabab éta ngarasa kageroan pikeun ngawujudkeun cita-cita awal pangwangunanna.
“Di Indonésia, ékspor Jawa Barat ieu nu pangbadagna. Maenya kanggo ékspor hungkul urang kedah ka Jakarta heula. Pan kedahna mah tiasa langsung ti Jawa Barat. Invéstasi pang ageungna nyaéta di Karawang. Mung kunaon kamiskinan nu pang ageungna oge aya di Karawang? Kumargi kitu hayu urang wujudkeun nawaitu diwangunna BIJB Kertajadi,” péntana.
Editor : Dadan Hendaya
