PURWAKARTA (NYUNDAYU),- Ayeuna Purwakarta geus jadi pilihan para wisatawan jadi tempat pikeun ngaleungitkeun kacapé tina sibukna pagawéan sapopoé. Loba déstinasi wisata nu ditawarkeun ku Purwakarta, boh wisata sajarah, kulinér, wisata balanja, atawa wisata alam.
Salah sahiji tempat wisata nu bisa jadi pilihan nyaéta Desa Sajuta Batu.
Desa Sajuta Batu nyaéta salah sahiji tempat wisata nu aya di Purwakarta, lokasina di daérah Pasanggrahan, Tegal Waru, Kabupaten Purwakarta, Jawa Barat.
Saluyu jeung ngaranna, di tempat wisata ieu urang bakal manggihan loba batu alam, mimiti ti ukuran nu leutik nepika nu ukurannana badag.
Teu ngan éta hungkul, lamun datang ka Desa Sajuta Batu ieu pangunjung bakal disuguhan ku panorama héjo nu éndah kacida.
Mimitina, tempat ieu ngan saukur tempat pikeun panjat tebing. Tapi ku sabab poténsi kaéndahan alamna tempat ieu jadi loba didatangan ku wisatawan nu hunting foto malah mah nepika acara prewedding.
Di Desa Sajuta Batu ieu, aya sababaraha spot nu matak ngirut jeung mindeng dijadikeun objék foto ku para wisatawan, sababaraha diantarana nyaéta:
1. Gunung Parang
Nu kahiji aya Gunung Parang. Destinasi wisata ieu malah mindeng disebut jadi rock climbing pangluhurna di Indonesia jeung no 2 pangluhurna di Asia.
Tempat ieu nu cocok pikeun pangunjung nu resep kana tantangan jeung climber profesional.
2. Gunung Bongkok
Gunung Bongkok jangkungna sakitar 975. Lamun anjeun aya di luhur puncakna, tangtu bakal disuguhan ku pamandangan nu éndah kacida, kaasup Waduk Jatiluhur.
3. Guha Bolong
Guha Bolong ieu lokasina aya di kaki Gunung Parang. Tempat ieu mindeng disebut jadi tempat mistis malah cenah mah mindeng dijadikeun tempat ritual.
Wisatawan ulah resah, di dieu fasilitasna aya aréa parkir kandaraan, mushola, kamar mandi, toilét, panginepan, nepika warung dahareun ogé aya.
Buka unggal poé salila 24 jam, para pangunjung teu kudu meuli tikét asup lamun rék ka Desa Sajuta Batu.
Sumber : bandungraya.inews.id/Rizal Fadillah
Foto: kerjaanrimba.wordpress.com
