BANDUNG (NYUNDAYU), – Bréw, Poé Saptu (18/3) ieu, Bandung Film Commission (BFC) ngagelar deui screening film nu tempat palaksanaanna di Gang Apandi, Braga Bandung. Acara ieu hasil kolaborasi BFC jeung Bandung Heritage, Braga.
Dimimitian pas jam 16.30 WIB, kagiatan SIMKURING ieu dihadiran ku sababaraha narasumber ti Bandung Heritage jeung seniman-seniman kasenian Jawa Barat. Kang Deden salaku wakil ti Bandung Film Commission ngilu nepikeun sambutan singget ka Bandung Heritage jeung para warga Gang Apandi nu datang jadi audiens sinema dina acara éta.
“Gang Apandi janten pusat palaksanaan SIMKURING di Bandung Raya taun ieu. Sanaos kagiatan urang sadaya ogé digelar di sababaraha kota sareng kabupatén Jawa Barat, namung Bandung janten salah sahiji tujuan utama Roadshow urang dina kagiatan screening film sareng workshop dinten ieu,” ceuk Kang Deden.
Palaksanaan program ieu digelar sabari ngajak warga Gang Apandi pikeun midangkeun kasenian Jawa Barat. Salah sahiji warga nu ilubiung dina program ieu nyaéta Téh Salma ku Tari Jaipong nu jadi pambuka acara. Salian ti éta, pidangan akustik ti Kang Adew ogé jadi ngaramékeun acara SIMKURING éta.
Kegiatan SIMKURING nu miboga tujuan ngaliterasi masarakat lokal ku sinema konvénsional, nyatana bisa laksana ngabantu kahayang masarakat di Gang Apandi Braga. Siga nu ditepikeun ku Téh Oda salaku narasumber ti Bandung Heritage yén “(Kagiatan) Ieu mangrupikeun salah sahiji kahoyong Braga Heritage saatos ngabandungan aspirasi warga Gang Apandi nu hoyong wilayahna disumpingan ku seueur pangunjung.”
Sagigieun éta Téh Oda ogé nepikeun yén Gang Apandi ieu mangrupakeun hiji “hidden gem” nu kasumputkeun di antara gaya hirup glamour Jalan Braga. “Warga ogé hoyong pisan wisatawan dongkap ka dieu,” émbohna dina acara bincang-bincang jeung moderator.
Kagiatan SIMKURING (Sinema Kuriling) ieu nyaéta salah sahiji program utama nu dilakukeun ku BFC dina raraga ngaédukasi jeung ngaliterasi masaraka lokal ku sinema lokal, sakumaha nu ditepikeun ku Sekjen BFC, Malikul Saleh.
“Kunanon namina SIMKURING, kumargi kagiatan ieu pusatna di Tanah Pasundan sareng pas pisan janten singgetan kanggo sinema kuriling,” ceuk salah sahiji wawakil BFC, Kang Malik.
Kang Malik ogé nepikeun ku jéntré pisan, yén sasaran audiens program ieu nyaéta barudak, kulantaran pikeun inyana barudak téh kudu diédukasi ti ngora kénéh ngeunaan dunya perfilman. Di lain sisi, BFC ogé miharep ka hareupna bakal aya layar alternatif nu bisa dimekarkeun jadi bioskop nu layak tonton pikeun wisatawan, nepika kacipta kamekaran ékonomi tina ngajual tikét. “Urang lokal ogé tiasa ngelola kawasan ieu janten lokasi syuting film. Tiasa ogé ngajak masarakat di dieu (Gang Apandi) janten aktorna,” sambungna dina obrolan siang éta.
Panuturan ngeunaan kamekaran ékonomi liwat kagiatan ieu ogé ditepikeun ku Kang Yana ti Disparbud Jabar. “Kagiatan ieu ogé ngabantos ningkatkeun ékonomi kréatif. Henteu kanggo screening hungkul, namung kagiatan workshop, musik sareng fashion ogé tiasa dikolaborasikeun sareng kagiatan ieu. Pasti dampak ékonomina ogé bakal karaos ku masarakat sabudeureun Gang Apandi.”
**
Éditor: Patricia/Mutia
