BANDUNG (NYUNDAYU.COM), – Munggaran, aya organisasi badag nu ngainisiasi déklarasi pikeun Ridwan Kamil bisa tandang dina Pemilihan Gubernur Jawa Barat. Organisasi ieu téh nu ngadegkeun Partai Golkar, nyaéta PDK Kosgoro 1957 Jabar jeung Depidar SOKSI Jabar nu dina Saptu (29/6) ieu, ngadéklarasikeun dukunganna ka mantan Gubernur Jabar (2018 – 2023) éta, pikeun mingpin deui Jabar taun 2024 – 2029.
Déklarasi nu ditepikeun sacara langsung ku pingpinan, nu kawangun ti Ketua jeung Sekretaris PDK Kosgoro Jabar H. Aria Girinaya jeung H. Yusup Munawar, sarta Ketua jeung Sekretaris Depidar SOKSI Jabar H. Yod Mintaraga jeung H. Yomanius Untung. Déklarasi ieu ditepikeun di Café Kopitera, Kota Bandung.
“Ku ngalempengkeun niat sareng ngecap Bismillahirrahmaanirrahiim, urang sadaya nyatakeun sikep, ngadukung sapinuhna pacalonan Ridwan Kamil salaku Gubernur Jawa Barat kanggo periode 2024-2029,” ceuk Aria nu diangkat jadi jubir basa konferénsi pérs.
Kadua organisasi ilubiung ngadorong DPD Partai Golkar Jawa Barat pikeun tetep konsistén nyatakeun Ridwan Kamil jadi sahiji-hijina Bakal Calon Gubernur nu diusulkeun ka DPP Partai Golkar. “Urang sadayana ngusulkeun ka DPP Partai Golkar kanggo saénggalna netepkeun Ridwan Kamil salaku Bakal Calon Gubernur Jawa Barat ti Partai Golkar,” tandesna.
Kosgoro jeung SOKSI ogé baris silih bantu ku rupa-rupa komponén masarakat, sabari ngaluarkeun sapinuhna énérgi pikeun ngameunangkeun Ridwan Kamil salila prosés nominasi. Pacalonan Ridwan Kamil lain taya alesan. Léngkah Ridwan Kamil salila jadi Gubernur Jawa Barat (2018-2023) diniléy mampuh ngokola pamaréntahan ku hadé pisan. Kabukti ku 550 penghargaan nasional jeung internasional nu disangking tina préstasi Pemerintah Provinsi Jawa Barat.
“Salami lima taun noron (2018-2023), Pemerintah Provinsi Jawa Barat nyangking status WTP (Wajar Tanpa Pengecualian) dina Laporan Keuangan nana. Ieu nandakeun yén kamampuh Ridwan Kamil ngokola dana APBN sareng APBS saé pisan,” pokna.
Pangwangunan di Jawa Barat, ceuk inyana, rélatif ngarata jeung ditarima ku masarakat, nepika tingkat kapuasan ka Ridwan Kamil aya dina 90,27%. Éta nunjukkeun kapimingpinan inyana geus mampuh ngalaksanakeun program nu nyata pikeun masarakat Jawa Barat.
“Warga Jawa Barat meryogikeun kénéh catetan karya Ridwan Kamil, nu karaos énggal teuing aya di Jawa Barat. Komo ampir ti 2 taun (2020-2021) basa kaalaman sasalad Covid-19, praktis pangwangunan teu lumangsung sacara optimal. Aya sababaraha pekerjaan rumah nu teu acan réngsé, nu meryogikeun saurang Ridwan Kamil kanggo ngabéréskeun nana,” émboh Aria.
Kulantaran éta, asa normal pisan lamun mayoritas masarakat Jawa Barat miharep Ridwan Kamil sadia neruskeun pangabdianna di Jabar ku dicalonkeun deui. Numutkeun hasil survey kamari, 68% warga Jawa Barat ngarepkeun kénéh Ridwan Kamil pikeun mingpin deui Jawa Barat. Sanajan asa gancang teuing pikeun ngayakeun survey éléktabilitas, sajauh ieu sakabéh survey nunjukkeun Ridwan Kamil teu katandingan pikeun tandang di Pemilihan Gubernur Jawa Barat.**
Éditor: Dadan Hendaya
