“MUSIK téh dasarna nyaéta bahasa universal, maénkeun musik hartina maénkeun budaya” ceuk Kang Agus Rukmana basa diwawancara di hiji stasiun TV.
Agus Rukmana téh seniman ti Tatar Sunda anu sok ngumbara dina budaya musik Sunda jeung laksana ngembangkeun téknik maénkeun lagu-lagu degung klasik ka repertoar gitar.
Kang Agus geus maén gitar ti taun 75-80an. Budaya Sunda ogé geus kentel pisan dina kahirupan sapopoé Kang Agus.
Jadi kacintaannana ka budaya Sundana téh geus ditanemkeun ti budak kénéh. Tah ti dinya ahirna di taun 2003, basa keur éksplorasi gitar, anjeunna kainspirasi nyieun atawa nyiptakeun hiji campuran antara Gitar jeung Degung, ceuk anjeunna lalampahan éta téh mangrupakeun lalampahan anu panjang.
Degung: Ngadeg Kanu Agung, ceuk Kang Agus. Sajero éta falsafah jeung deukeutna musik, budaya jeung kahirupan, ceuk Kang Agus. Ceuk manéhna ogé, budaya musik khususna degung geus aya ti zaman Karajaan Pajajaran anu hartina sakitar abad 10 – 15. Tapi ngan dipaké dina kelompok masarakat tertentu hungkul, jadi nyebarna ngeunaan budaya ieu ogé teu pati maju di zaman harita mah.
Kang Agus Rukmana jeung repertoar gitar degungna laksana dipercaya ku Pamaréntah Jawa Barat di Bandung pikeun rekaman mangrupa hiji album lagu-lagu degung klasik maké gitar terus dijadikeun oléh-oléh atawa souvenir pikeun nagara-nagara pamilon Konférénsi Asia Afrika anu ka-50. Di Taun 2005, album éta diarsipkeun antara di Singapura atawa Amérika, ceuk Agus. Kang Agus ogé kungsi sababaraha kali diundang ku média siga: Trans7, ANTV, SCTV jeung Paméran Pérs Nasional. Kang Agus Rukmana ngarepkeun generasi milénial zaman ayeuna bisa sadar yén budaya-budaya sunda ogé teu éléh kerénna jeung budaya luar, khususna dina bidang musik.
Lamun teu aya anu neruskeun ngamumulé budaya musik ieu, ulah anéh lamun budaya musik degung ogé bakal punah jeung ngaleungit. Pamaréntah salaku badan anu miboga kapentingan kudu ogé nyiptakeun stratégi jeung inovasi pikeun generasi milénial sangkan budaya sunda bisa dipikaresep jeung dokuméntasi sacara akademisna ogé kudu leuwih diperhatikeun méh generasi kahareup apal kana sajarah budaya ku ayana literatur jeung dokuméntasi anu alus.
Kang Agus ogé masih aktif ngamusik nepika ayeuna jeung sempet boga kelompok musik anu ngaranna Gentra Sora Rasa Sunda. Anjeunna ogé geus nyusun pengembangan téknik ngamaénkeunnana ka hiji buku pembelajaran anu judulna “Bermain Gitar Degung” jeung ngadokuméntasikeun karya-karyana sacara audio ka kanal YouTube anu dibéré ngaran Saddasphere.
Éditor : Rimaldi Pasya Mansoer
