BANDUNG (NYUNDAYU), – Éksisténsi Bandara Internasional Jawa Barat (BIJB) Kertajati jeung Wisma Haji Indramayu, teu leupas ti peran serta Komisi IV DPRD Jabar, nu milu nyekel posisi konci dina rarancang program jeung panganggaran.
“Ketua DPRD ayeuna Bu Ineu Purwadewi, Ketua Komisi IV Pa Ali Hasan, teras Pa Icak sareng Pa Kusnadi sasarengan, kantos ‘boloboran getih’ merjuangkeun pangwangunan Kertajati sareng Wisma Haji Indramayu,” ceuk anggota Komisi V DPRD Jabar, H. Yod Mintaraga, ka wartawan, Senen (29/5). Basa panyusunan program, Yod jadi Ketua Fraksi Partai Golkar.
Pajoangan harita dina sababaraha taun mata anggaran, taun ieu mimiti karasa mangpaatna pikeun rahayat loba. “Sabagéan jamaah haji calon haji 1444H parantos tiasa ngawitan lebet ka Wisma Haji Indramayu, teu kedah di Pondok Gedé atanapi Bekasi,” pok Ketua Depidar SOKSI Jabar ieu.
Yod nepikeun aprésiasi ka mantan Bupati Indramayu nu oge Ketua DPD Partai Golkar Jabar, almarhum Yance S. Syafiuddin, nu geus babarengan ngawujudkeun Wisma Indramayu. “Peran almarhum nu kitu ageungna, dugika wangunan tohaga Wisma Haji tiasa ngadeg sareng gaduh mangpaat ageung kanggo jamaah calon haji,” émboh anggota Dewan ti Dapil Kota/Kab. Tasikmalaya ieu.
Inyana yakin, Bandara Kertajati ogé bakal geura nyusul ngalayanan jamaah calon haji. Lamun fasilitas bandara geus sampurna, jalan tol ka bandara oge geus bérés, ieu bakal ngaakselerasi pangwangunan wewengkon éta.**
Éditor: Dadan Hendaya
