BANDUNG (NYUNDAYU). – Unggal poé, laut ngabudalkeun runtah ka basisir Pantéy Talanca, Desa Loji, Kacamatan Simpenan, Kabupatén Sukabumi. Kondisi nu ngaprihatinkeun ieu nu ngajadikeun sajumlah nonoman désa satempat kahudangkeun, nu terus maranéhna nyulap runtah éta jadi ladang piduiteun.
Di lokasi pantéy nu deukeut jeung PLTU, runtah kai éta ku maranéhna diolah jadi salah sahiji solusi keur Cofiring PLTU Jabar 2 Palabuhanratu. Cofiring mangrupakeun prosés panambahan biomassa nu jadi bahan bakar alternatif parsial atanapi bahan campuran batu bara di PLTU.
“Upami aktivitas dinten ieu mah urang sadaya ngempelkeun sampah kai-kai nu aya di pantéy teras diolah janten biomassa, ieu hasilna urang kirimkeun ka PLTU Palabuhanratu sareng kaleresan pihak anjeunna nu ngabantos urang di lapangan salami ieu,” ceuk Bayu Nugraha, nu loma katelah Kang Sabay, ka detikjabar, Senen (3/10/2022)
“Mesin ieu didamel ku rerencangan nu émang tos biasa ngoprék kanggo midamel mesin dimodalan ku PLTU, aranjeunna masihan fasilitas ka urang sadayana janten mitra binaan PT Indonesia Power. Nya Alhamdulillah, dugika dinten ieu program nu ngaberdayakeun urang sadaya ieu teras jalan, murangkalih henteu deui turun ka jalan, langkung sibuk milarian artos,” heureuy Sabay nu baheulana pupuhu géng motor ngajelaskeun mimiti jalan hijrahna.
“Bahan baku tiasa urang sebatkeun teu kawates, kumargi unggal dinten lautan ngirimkeun runtah kai ieu ka basisir pantéy urang ka basisir sakantenan bari beberesih pantéy milihan sareng milahan sampah nu tiasa dimangpaatkeun. Kaperyogian PLTU kanggo Sawdust ieu dugika ayeuna nyaéta 150 ton sadintenna,” Sabay ngungkabkeun..
Teu ngan ka PLTU, Sawdust jieunan Sabay oge geus dirérét ku sababaraha pausahaan badag, aya oge nu ti Éropa.
“Réréncangan dugika ayeuna ngoprék kénéh mesin, nu langkung ramah lingkungan. Panginten harepan urang ka payunna nganggo tanaga listrik ku mangpaatkeun panasna basisir sapertos ku panél surya. Ku kituna urang tiasa ngadamel mesin pancacah kai ku bahan energi litrik, kapasitas tiasa diageungan ku kuantitas hasil nu langkung saé pisan,” papar Sabay.
Pantéy Loji salila ieu émang geus jadi langganan sorotan ngeunaan numpukna runtah di wewengkon éta. Sababaraha kali agénda beberesih pantéy digelar ku pamaréntah satempat atanapi organisasi nirlaba. Ngan sajalan jeung waktu, runtah terus datang teu bisa ditahan.
Ngan hal éta jadi barokah pikeun Kang Sabay kulantaran cadangan bahan baku nu euweuh watesna jeung bakal jadi ikhtiar pikeun mersihan pantéy.
Basa dikonfirmasi, GM PT Indonesia Power PLTU Jabar 2 Palabuhanratu Rizqi Priatna ngabenerkeun carita Sabay, inyana nyebutkeun kiprah Sabay jeung babaturanna éta salaku mitra binaan PLTU. Bagéan tina kapadulian maranéhna ka lingkungan basisir pantéy.
“Mitra Binaan ieu awalna dibentuk kumargi aya kapadulian kana runtah nu numpuk di Pantéy Loji, kumargi kiriman ti dua muara nu aya di sabudeureun pantéy. Aranjeunna oge sasarengan sareng BUMDES Loji sarta nonoman Loji nu paduli kana kabersihan sareng kaendahan pantéy,” ceuk Rizqi basa dikonfirmasi detikjabar.
“Sadaya hasil produksi mitra binaan baris dipésér langsung ku PLTU Palabuhanratu sareng dianggé kanggo bahan baku Cofiring. Hal ieu tangtosna tiasa ningkatkeun taraf ékonomi masarakat sakitar,” émbohna.
Sumber: detik.com/Syahdan Alamsyah
Foto: sukabumiwow.com
