URANG Sunda pantes reueus ku sajarahna téh. Da, loba titinggal atawa warisan sajarahna. Kitu téh saperti nu kungsi ditepikeun ku Guru Besar Fakultas Ilmu Budaya (FIB) Universitas Padjadjaran (Unpad) Prof. Dr. Reiza D. Dienaputra, M.Hum., waktu sawala virtual dina Keurseus Budaya Sunda. Prof. Reiza harita (1/9/2021) medar “Sajarah Sunda, ti Bihari ka Kiwari”dina diskusi nu diayakeun ku Pusat Digitalisasi dan Pengembangan Budaya Sunda Unpad.
Tatar Sunda, ceuk Reiza ngabogaan riwayat lalampahan sajarah anu panjang. Salah sahijina nu ngabedakeun ieu wewengkon jeung wilayah sejenna téh, bukti masa prasejarah-na. Tah, ceuk ieu Guru Besar Departemen Sejarah dan Filologi FIB Unpad, sajarah Tatar Sunda dibagi kana dua babak badag nyaéta mangsa prasejarah jeung mangsa sajarah. Ieu dua babak sajarah téh jadi kaunikan di Tatar Sunda. “Da, henteu sadayana provinsi di Indonesia ngalaman dua babak sajarah sapertos kieu. Teu sadayana ngalaman mangsa prasejarah,” pokna.
Prof. Reiza nétélakeun, bukti yén Tatar Sunda ngalaman mangsa prasejarah téh tembong tina sababaraha artefak. Papanggihan kawas kitu téh, lain ukur ti hiji tempat, da sumebar di sawatara daerah tatar Sunda, ti antarana Cianjur, Sukabumi, Kuningan, jeung Ciamis. Umumna, bukti mangsa prasejarah Sunda anu geus kaungkab lolobana mah mangrupa batu-batuan.
Dumasar kana pangimeutan Prof. Reiza, bukti babatuan kawas kitu téh nyirikeun yén warisan karuhun saperti kitu téh asalna tina zaman batu, atawa dina mangsa Paleolitikum, Mesolitikum, Neolitikum, Megalitikum, nepi ka zaman perunggu. “Zaman prasejarah téh dipiwanoh minangka zaman saméméh ayana tulisan,”pokna.
Prof. Reiza yanikeun yen loba keneh wilayah di Jawa Barat anu ngabogaan artefak nu asalna ti mangsa prasejarah. Sababaraha wilayah di kota/kabupatén di Jawa Barat ngaku ngabogaan bukti-bukti anyar tina mangsa prasejarah Sunda. Ngan, papanggihan saperti kitu téh perelu disawalakeun sarta panalitian nu leuwih gemet.
“Urang kudu ati-ati nangtukeunana, lantaran henteu kabeh batu téh tinggalan prasejarah. Kedah aya panalitian nu bener-bener daria,” pokna semu ngingetan. *** (Arka)
Foto: disbudpar.jabarprov.go.id
