BANDUNG (NYUNDAYU). – Mantan Wakil Présiden Jusuf Kalla ngarepkeun Menteri Keuangan Sri Mulyani pikeun teu nyingsieunan masarakat ku bakal kajadianna resési ékonomi dina taun 2023 nu datang.
Hal ieu diungkabkeun ku anjeunna dina dialog ékonomi kabatas nu judulna “Menakar Ketahanan Ekonomi Indonesia dalam Menghadapi Krisis Global” di imah Ketua Dewan Pembina Ikatan Saudagar Muslim Indonesia (ISMI) Jabar, Agung S. Sutisno, Kemis (3/11).
“Abdi nelepon Menkeu. Teu leres ieu urang sadaya gaduh Menkeu nu nyingsieunan siga ékonomi badé kiamat waé. Énergi sareng pangan urang kiat pisan kénéh. Ulah disamikeun sareng nagara sanés,” pok mantan waprés nu loma disebut JK ieu.
Numutkeun anjeunna, fundaméntal ékonomi Indonesia cukup kuat. “Listrik urang surplus. Batubara seueur pisan. Minyak leres aya impor, mung urang tiasa kénéh ngagenjot produksi nyalira. Éksportir ti Kalimantan, Sulawesi, atanapi Jabar ayeuna kenging kauntungan nu langkung ageung.”
JK ngingetan para peserta diskusi -nu leuwih ti satengahna nyaéta pangusaha- ku krisis nu kajadian di taun 1988. Basa harita, resési teu sifatna nasional. Buktina, urang Sulawesi tetep bagja. Mun satacanna naék haji kudu ngajual coklat saloba 5 ton, keur krisis harita ngan cukup ku 1 ton.
Kitu oge ayeuna, krisis ngan kajadian di sababaraha nagara Amérika jeung Éropa, tapi lain di Asia, kaasup Indonésia. “Tuwuhna ékonomi Viétnam dugi 7,5%, Filipina 7%, Malaysia 6%, urang di 5%, janten teu kedah hawatos teuing,” jelas mantan Ketum DPP Partai Golkar ieu.
“Abdi nelpon Sri Mulyani, éh anjeun tong nyingsieunan urang. Engkin urang pada mésér dolar, rupiah langkung anjlok. Inflasi sanés hiji hal nu kedah dipikahawatos, kumargi baris ngadorong urang kanggo ningkatkeun produksi. Pausahaan bangkrut sanés ku inflasi, mung kulantaran lepat ngurus, panginten hutangna seueur teuing,” émboh JK.**
Éditor: Dadan Hendaya
Foto: Istimewa
