BANDUNG (NYUNDAYU), – Saminggu katukang, Bupati Bandung Dadang Supriatna kungsi silih sindir di medsos jeung Gubernur Jabar Ridwan Kamil, pakait kamacetan di Bojongsoang – Balééndah, nu merlukeun solusi flyover. Ngan katémbongna aya nu leuwih parah tinimbang kamacetan di kawasan éta.
Lamun urang warga wewengkon wétan Bandung, pasti geus teu ahéng lamun ngaliwat ka jalan raya Cileunyi-Cibiru nu ka Kota Bandungkeun. Kamacétan pasti kajadian utamana dina wanci isuk-isuk mangsa indit gawé jeung soré lamun mulang gawé. Malah mah di weekend, pasti sok macét sapopoé nepika peuting.
“Senen kamari abdi bade nganteur murangkalih ka sakola Al Ma’soem di Rancaékék. Mung dugika di gerbang komplék kanggo kaluar ka jalan raya, mobil teu maju-maju pisan salami satengah jam. Antukna murangkalih teu lebet sakola, kumargi parantos telat. Tong boro mobil, motor oge ampir teu tiasa gerak,” ceuk Acéng, warga Bumi Panyawangan, Jumaah (3/3)
Dina poé biasa, émbohna, lamun indit ti imah jam 06.00, kudu geus sukur lamun nepi di sabudeur Cicaheum jam 08.00. “Janten urang kedah angkat sateuacan tabuh 06.00 pami palay langkung énggal. Sateuacan kamacétan ngarajaléla,” pokna.
Warga Manglayang Regency, Yayan nyebutkeun, para supir angkot remen kedal, jalan raya Cileunyi-Cibiru kasebut jalur “naraka” lamun isuk jeung soré. “Aya ratusan komplék perumahan di kidul sareng kalér jalan raya. Janten pami nuju jam kerja, sadaya paboro-boro kaluar komplék. Kitu oge pami sonten, kandaraan rurusuhan mulih ka bumi dina waktos nu sasarengan.”
Inyana teu anéh lamun di isuk-isuk, antara Cileunyi ka Cibiru nu ngan 4 km, kudu méakkeun waktu 45 menit. “Pami nembé munggaran ka jalur ieu, tangtos kesel pisan. Mung pami urang nu linggih di daérah ieu, nya pasrah wé, tos kumaha deui. Kanggo ka tol Cileunyi oge macét sareng muterna tebih teuing pami urang kantorna di Bandung kalér,” jelasna.
Inyana ménta Pemprov Jabar jeung Pemkab Bandung tong kalah silih sindir di medsos, tapi leuwih alus nyieun léngkah action pikeun néangan solusi tina kamacétan nu geus nahun ieu. “Jalur ‘naraka’ kedahna tiasa katungkulan ku palébaran jalan, atanapi flyover Cibiru nu kapungkur kantos digambar Ridwan Kamil sanaos ayeuna mung di atas kertas. Atawa tiasa ogé ngadamel Lingkar Utara nu kapungkur ogé kantos direncanakeun,” ceuk Yayan.**
Éditor: Dadan Hendaya
