JAWA BARAT kapilih jadi Juara Umum dina Lomba DMI Award, anu munggaran digelar. Ieu téh lomba pikeun metakeun masjid jeung mushola anu digelar ku PP DMI (Pimpinan Pusat Dewan Masjid Indonesia). Dina raraga Milad ka-50 DMI, munggaran digelar DMI AWARD.
Dina sambutannana basa syukuran kahontalna gelar Juara Umum, Gubernur nekenkeun sangkan Jabar jadi juara lahir batin. “Urang sadaya henteu ngan ngawangun sacara fisik, tapi ogé batin wargana, supados tiasa ngagaduhan nilai-nilai spiritual anu aya dampakna ka ahlak anu saé.” ceuk Gubernur, di Gedung Saté, Bandung, kamari ieu.
Ridwan Kamil ngarasa reueus, kusabab Jabar bisa unggul ti provinsi séjén dina DMI AWARD. “Ieu sanés panghargaan lalawora, sabab anu nganiléyna ogé para ahli di widang masjid jeung mushola.”
Sagigireun éta, Ketua Penyelenggara DMI AWARD, Dr. Mukhtadi El Harry, MM, nyebutkeun dihontalna gelar Juara Umum henteu leupas tina peran Ketua PW DMI Jabar KH. Achmad Syidik jeung Pengurus Pusat DMI Brigjen (Purn) Dr. Arief Prayitno. “Salaku warga Jabar, duanana ogé berperan aktif dina ngaorganisasikeun DMI sareng ngajadikeun masjid-masjid sa-Jabar langkung saé,” pokna. “Kyai Achmad Syidik luar biasa kerja kerasna supados DMI Jabar tiasa sapertos ayeuna ieu, samentawis Pa Arief sanajan ayeuna aktif di dunya olahraga, henteu ngaleupas jatidirina salaku Muslim anu mikacinta masjid. Mugia jasa duanana dicatet janten amal shaléh,” ceuk Mukhtadi.
Dijelaskeun, tujuan DMI AWARD lain ngan pikeun néangan masjid jeung mushola pangalusna, tapi ogé salaku sarana pembinaan sangkan sakabéh masjid jeung mushola diusahakeun pikeun jadi leuwih alus.
DMI AWARD anu munggaran, ngalombaeun 8 tipologi, nyaéta masjid: Besar, Agung, Jami, Raya, Perkantoran, Kampus, Rést Aréa (Sarana Umum) Mushola jeung 9 kategori, nyaéta: Pembinaan Remaja Masjid, Ramah Anak, Kaséhatan & Sumber Daya Lingkungan, Sosial Kamanusiaan & Penanggulangan Bencana, Pemberdayaan ékonomi & Kawirausahaan, Peribadatan & Hukum, Dakwah & Pendidikan, ZISWAF jeung Manajemen Masjid.*
Éditor: Dadan Hendaya
