BANDUNG (NYUNDAYU.COM), – Kandidat Gubernur Jabar Ono Surono sacara teges nampik parobahan Rencana Pembangunan Jangka Menengah Daérah (RPJMD) Jawa Barat taun 2018-2023, pakait kawasan segitiga metropolitan Rebana (Cirebon-Patimban-Majalengka).
“Abdi sanés nampik industrialisasi, namung seueur wewengkon tatanén produktif di Subang, Indramayu sareng Cirebon tiasa ical kulantaran ku ayana pabrik-pabrik sareng industri-industri anyar,” teges Ono basa ngabiantara di Serial Diskusi Pilkada “Mencari Pemimpin Pilihan Rakyat,” nu diinisiasi Jaringan Media Siber Indonesia (JMIS) Jabar jeung PW Muhammadiyah Jabar, Saptu (3/8).
Hadir salaku panelis nyaéta ahli pulitik Unpad Firman Manan jeung Sekretaris JMSI Jabar Dadan Hendaya. JMSI ngagelar serial diskusi unggal ahir minggu, ngahadirkeun para kandidat Gubernur/BUpati/Walikota sa-Jabar di Sekretariat JMSI, Jl. Maskumambang 39 Bandung. Minggu hareup, aya Haru Suandharu, kandidat Gubernur Jabar ti PKS, nu bakal jadi narasumber diskusi.
DIjelaskeun, wewengkon Subang, Indramayu, Cirebon, Majalengka, Kuningan jeung Sumedang nyaéta wewengkon tatanén nu ngabutuhkeun sumberdaya cai nu cukup. “Tah cai di wewengkon éta moal cekap kanggo industri. Ngarobih tina agraris ka industri peryogi kajian nu daria ti pamaréntah. Tong dugi sapertos Karawang, tina lumbung paré nasional janten kota industri, mung teu ngadamel warga Karawang langkung makmur,” tandes Ketua DPD PDI Perjuangan Jabar ieu.
Inyana prihatin, ti mimiti Karawang dijadikeun daérah industri, rahayat Karawang malah ngalaman kamunduran. Faktana, loba pagawé industri malah mah lain ti warga Karawang asli; dina taun 2021 ogé Karawang asup kategori kabupaten nu miskin, ku jumlah pangangguran nu lumayan badag.
Ono nganiléy, roadmap atanapi blueprint pangwangunan Rebana masih rumeuk. “Abdi baris nepikeun ka pamaréntah kanggo diévaluasi. Investor ogé kedah diprotéksi, tong dugika dirugikeun. Ingkahna pabrik-pabrik ka Jateng kedah janten palajaran, kumaha palayanan pamaréntah provinsi atanapi pemkab sareng pemkot kedah langkung ditingkatkeun,” pokna.
Siga nu geus dipikanyaho, wewengkon Rebana mangrupakeun wewengkon di bagéan kalér jeung wétan Provinsi Jabar, nu nutupan tujuh daérah kabupatén/kota, nyaéta Kab. Sumedang, Majalengka, Cirebon, Subang, Indramayu jeung Kuningan sarta Kota Cirebon. Bakal aya parobahan sistem paékonomian din Jabar, ku ngabukan 13 kawasan pikeun industri anyar di 7 kabupatén jeung kota éta.**
Éditor: Dadan Hendaya.
