BANDUNG (NYUNDAYU.COM), – Pangwangunan rupa-rupa industri jeung infrastuktur fisik di Jawa Barat kabukti jadi salah sahiji solusi pikeun akselerasi jeung ékspansi pangwangunan ékonomi Indonesia hususna di Jawa Barat. Ngan jiga dua sisi mata uang, pangwangunan industri ieu sakapeung mah miboga akibat goréng ka lingkungan.
Hal éta kaungkab dina diskusi “Mencari Pemimpin Pilihan Rakyat” Sekretariat JMSI Jabar, Cafe Kampring, Jl. Maskumambang 39 Bandung, Minggu 14 Juli 2024.
“Naon nu badé dipidamel ku anjeun (Ilham Habibie) supados pangwangunan (industri) teu ngagaduhan pangaruh awon ka lingkungan,” taros Ketua Lembaga Hikmah Kebijakan Publik PW Muhammadiyah Jabar Dr. Rd. Ahmad Buchari, S.IP., M.Si.
Ngaréspon patarosan éta, bakal calon gubernur (bacalon) Jawa Barat ti Partai Nasdem, Dr.-Ing. H. Ilham Akbar Habibie, Dipl.Ing,. MBA ngaku miboga cara husus pikeung pangwangunan industri nu moal mawa pangaruh goréng ka lingkungan.
“Abdi baris ngaupayakeun teras merhatoskeun ESG (Environmental, Social and Governance). Dugika industri ieu teu ngaganggu lingkungan, masarakatna sareng gaduh tata kelola nu saé. Tong dugika engkéna ngareksak lingkungan,” teges Ilham.
Dina kasempetan éta ogé, panitén pulitik Unpad Affan Sulaéman nyigeung sual Sumber Daya Manusia (SDM) di Jawa Barat nu tingkat atikanna handap kénéh. Affan nyaritakeun Badan Pusat Statistik (BPS) nyatetkeun, yén rata-rata lama sekolah dina taun 2022 nyaéta 9,078 taun pikeun lalaki samentara 8,48 pikeun awéwé.
“Hartosna rata-rata lama sokolah masarakat Jawa Barat ayeuna ieu teu langkung ti 9 taun, hartosna rata-rata usia pendidikan masarakat Jawa Barat mung dugika sekolah menengah pertama (SMP),” ceuk Affan.
Ngaréspon hal éta, Ilham teu nampik lamun kualitas SDM jadi penting pikeun ngaoptimalkeun pangwangunan teu ngan industri tapi ogé widang nu séjén jiga pertanian, fesyen, musik, kabudayaan lokal nepika kulinér.
“Kumargi kitu, abdi gadu 3 visi misi unggulan nyaéta kahiji ngabuka lapangan padamelan. Nu kadua nyaéta atikan boh formal atanapi informal sarta katilu nyaéta ningkatkeun usaha mikro kecil menengah (UMKM),” tegesna.
Ilham ngaku miboga impian pikeun ngangkat Jawa Barat tiasa maju ku ningkatkeun Sumber Daya Manusia nu implikasina bakan nguatkeun séktor industri di Jabar.
“Pami urang ningali datana, 55 persen industri di Indonesia ieu aya di Jawa Barat. Éta tiasa janten basis kanggo urang sadaya tiasa maju ka payun. Koncina nyaéta SDM urang kanggo ngajantenkeun industri urang pinunjul di mana Jabar ngagaduhan industri nu stratégis sapertos PT DI, Pindad, Dahana, LEN, Telkom, KAI. Kedah ku urang dimekarkeun industri nu sanésna, kumargi éta konci kanggo ngahontal Indonesia Emas,” tegesna.
“Lamun industri kiat oge tiasa ngahadirkeun lapangan kerja. Mung sanés hartosna séktor nu sanés teu diperhatoskeun,” sambung Ilham.
Siga nu dipikaapal, acara diskusi pilkada rutin unggal poé Minggu pasosoré ieu diinisiasi Jaringan Media Siber Indonesia (JMSI) Jabar jeung PW Muhammadiyah Jabar nu kalaksana di sekretariat JMSI Jabar, Cafe Kampring Jl. Maskumambang 39 Bandung. Hadir salaku panelis dina diskusi éta nyaéta panitén pulitik Unpad Dr. Affan Sulaeman, jeung Ketua Lembaga Hikmah Kebijakan Publik PW Muhammadiyah Jabar Dr. Rd. Ahmad Buchari, S.IP., M.Si.**
Éditor: Dadan Hendaya
