BANDUNG (NYUNDAYU.COM) – Parnyataan ti pamaréntah sual rarancang tumuwuhna ékonomi di luhur 6% di taun 2025 jadi katémbong non sense, lamun teu nyigeung séktor industri. Kulantaran percepatan ékonomi anyar bakal kajadian lamun pihak industri meunang prioritas perhatian ti pamaréntah.
Hal ieu ditepikeun ku kandidat Gubernur Jabar Dr.-Ing H. Ilham Akbar Habibie, Dipl.Ing, MBA, basa jadi narasumber dina serial diskusi pilkada “Mencari Pemimpin Pilihan Rakyat”. Putra mantan Présiden Prof. B.J. Habibie ieu diduking ku Partai Nasdem pikeun maju dina Pilgub 27 November 2024 ka hareup.\
Acara diskusi pilkada rutin unggal poé Minggu pasosoré ieu diinisiasi Jaringan Media SIber Indonesia (JMSI) Jabar jeung PW Muhammadiyah Jabar. Diskusi digelar di sekretariat JMSI Jabar, Cafe Kampring, Jl. Maskumambang 39 Bandung, Minggu (14/7). Biantara ti Ilham terus dibahas ku dua urang panélis, nyéta Dr. Affan Sulaeman, panitén pulitik Unpad Prof. Dr. Ahmad Buchari.
“Indonésia emas baris kahontal pami kajantenan industrialisasi dina sagala widang. Industrialisasi éta baris ngarobah mindset unggal manusa. Sareng éta tiasa diterapkeun di sadaya séktor, tatanén, pakebonan, wisata, jasa atanapi industri kréatif,” ceuk Ilham.
Inyana nyontokeun, industri tatanén di Jepang maju, kitu ogé industri kréatif di Koréa jadi ngadunya, kulantaran didorong jadi industri. Patani di nagara-nagara maju éta mah pada makmur —lain di handapeun garis kamiskinan siga di Indonésia— lantaran widang tatanénna dirobah jadi industri.
“Industri baris ngarobah produksi janten langkung massal. Mesin-mesin sareng téknologi baris nikelkeun produksi naon ogé, dugika tumuwuhna ékonomi kadongkrak,” pokna.
Ilham oge nyorot posisi Jabar nu strategis pisan dina ningkatkeun tumuwuhna ékonomi ieu. “Jabar nyaéta tulang tonggong Indonesia. Ngawangun Indonésia emas lokomotifna nyaéta Jabar. Kulantaran 55% industri aya di Jabar,” tandesna.**
Éditor: Dadan Hendaya
