BANDUNG (NYUNDAYU). – PT PLN (Perséro) mastikeun moal aya kanaékkan tarif listrik nepika ahir taun. Kawijakan ieu ogé geus disatujuan Kementerian Energi jeung Sumber Daya Mineral (ESDM).
Ceuk Diréktur Utama PT Perusahaan Listrik Negara (Perséro), Darmawan Prasodjo, pamaréntah tetep nahan tarif listrik pikeun periodeu Oktober-Désémber 2022 sanajan réalisasi paraméter ékonomi makro ngalaman kanaékkan.
“Teu aya kanaékkan tarif listrik. Ieu kanggo ngajagi ningkatna daya pésér masarakat sareng ngajagi stabilitas ékonomi,” ceuk Darmawan dina siaran pérs, Salasa (27/9/2022).
Salian éta, PLN ogé mastikeun moal aya panghapusan golongan palanggan listrik ku daya 450 Volt Ampere (VA). Daya listrik 450 VA ogé moal bakal dialihkeun jadi 900 VA jadi tarifna tetep sarua dina golongan séwang-séwangna.
“Kaputusan pamaréntah atos jelas pisan. Henteu aya parobihan daya tina 450 VA ka 900 VA sareng PLN siap ngajalankeun kaputusan éta. PLN henteu kantos ngabahas formal atanapi ngarencanakeun pangalihan daya listrik 450 VA ka 900 VA.” pokna.
PLN neruskeun komitmen ngajaga pasokan listrik nu andal, sarta ngarojong pamaréntah pikeun ngalakukeun pemulihan ékonomi nasional, ngajaga daya beuli jeung produktivitas masarakat.
Salila periodeu 2016-2021, pamaréntah geus nyalurkeun Penyertaan Modal Negara (PMN) ka PLN pikeun ngawangun infrastruktur kalistrikan saloba Rp40 triliun, khususna di kawasan 3T (Terdepan, Terluar, Tertinggal).
Salian éta, disalurkeun ogé stimulus saloba Rp24,3 triliun pikeun masarakat dina upaya ngurangan beban ékonomi dina kaayaan sasalad Covid-19.
Salila 2017-2021, dibéré ogé subsidi saloba Rp243 triliun jeung kompénsasi saloba Rp94 triliun sangkan masarakat tetep meunang listrik ku tarif kajangkau dina raraga ngajaga produktivitas jeung tuwuhna ékonomi.
Saméméhna, Kementerian Energi jeung Sumber Daya Mineral geus mutuskeun panyaluyuan tarif tanaga listrik (tariff adjustment) periodeu Oktober-Désémber 2022 pikeun 13 palanggan non subsidi teu ngalaman parobahan atawa tetep.
Kaputusan éta dicandak otoritas énérgi jeung sumber daya mineral ngarujuk kana réalisasi indikator makro ékonomi Méi nepika Juli 2022.
Plt Diréktur Jénderal Ketenagalistrikan Dadan Kusdiana nyatakeun, réalisasi paraméter ékonomi makro rata-rata Méi nepika Juli 2022 bakal naék saeutik lamun dibandingkeun jeung dina triwulan katilu 2022.
Ku kituna, ceuk Dadan, tarif listrik triwulan kaopat pikeun palanggan non subsidi tetep ngarujuk kana tarif triwulan katilu atawa moal naék dina ahir tahun ieu.
Editor : Rizal Fadillah
Sumber: bandung.inews.id
Foto:katadata.co.id, web.pln.co.id
