BANDUNG (NYUNDAYU.COM), – Salah sahiji tugas badag nu disanghareupan ku Gubernur Jabar ka hareupna nyaéta ningkatkeun income, ambéh APBD teu terus morosot. Dibutuhkeun saurang Gubernur nu miboga pamikiran out of the box jeung kréatif sangkan anggaran teu béak ngan keur pengeluaran rutin mayar pagawé.
“Dina taun panungtungan Kang Ahér janten Gubernur (Ahmad Heryawan, Red) dina 2018, APBD Jabar ngahontal Rp48 triliun. Samentawis ayeuna, RAPBD 2025 mung kira-kira Rp30 trilyun. Ieu pibahayeun pami APBD teras morosot,” ceuk kandidat Gubernur Jabar ti PKS Dr. H. Haru Suandharu.
Hal ieu ditepikeun basa jadi narasumber dina serial diskusi pilkada nu judulna “Mencari Pemimpin Pilihan Rakyat”, di diinisiasi Jaringan Media Siber Indonesia (JMSI) Jabar jeung PW Muhammadiyah Jabar, Senén (5/8).
Biantara Haru ogé dibahas ku tilu panelis, ahli pulitik Unpad Dr. Firman Manan, Dr. Affan Sulaeman jeung Sekretaris PW Muhammadiyah Jabar Dr. Iu Rusliana. Serial diskusi ieu geus asup kana minggu kagenep, ku ngahadirkeun para kandidat gubernur, bupati jeung walikota nu poténsial.
Numutkeun Ketua Fraksi PKS DPRD Jabar ieu, Gubernur nu kahareup kudu mampuh ngarojong poténsi-poténsi pendapatan provinsi. “Seueur asét daérah nu tiasa digawébarengkeun sareng swasta, atanapi optimalisasi digital marketing ku para palaku usaha, sarta ngaberdayakeun patani, paternak sareng pamayang nu poténsial ningkatkeun income. Janten teu tiasa Gubernur mung ngantosan ti pusat,” pokna.
“Ti APBD saageung Rp30 trilyun éta, nu laluasa kanggo pangwangunan mung Rp2 trilyun, samentawis sésana kanggo pangaluaran rutin. Bayangkeun pami 2T éta mung dianggo kanggo pencitraan, ampir teu aya mangpaat nu kahartos nu dipikenging masarakat. Abdi ngaraos musuh sadayana urang ayeun ieu nyaéta pencitraan,” teges Haru.
Inyana ngaprésiasi upaya nu dilakukeun Pemprov Jabar lima taun katukang ieu, ku mampuh ningkatkeun jumlah invéstasi. “Mung invéstasi kanggo saha? Kumargi faktana, jumlah pangangguran malah nambihan. Pan kedahnana mah invéstasi éta ngagaduhan korélasi positif sareng panambihan jumlah lowongan padamelan, sanés sabalikna,” tandesna.**
Éditor: Dadan Hendaya
