TASIKMALAYA (NYUNDAYU), – Leuwih ti saratus nonoman kaum milénial hadir dina silaturahmi Karang Taruna Kec. Cipatujah Kab. Tasikmalaya jeung anggota DPRD Jabar H. Yod Mintaraga, poé Senen (3/4).
Arinyana katémbong antusias amprok jeung wakil rakyat nu geus lila ngawakilan daérah pamilihan Tasikmalaya. Komo deui dina suasana Ramadhan nu kuat pisan kaitanna jeung silaturahmi.
“Urang sadaya Karang Taruna ti Desa Cikawunggading, Desa Cipatujah, Desa Sindangkerta sareng Desa Ciheras, ngaraos bagja kumargi tiasa pendak langsung sareng anggota Déwan nu salami ieu parantos seueur pisan masihan kontribusi kanggo kacamatan ieu,” ceuk Ketua Karang Taruna Cikawunggading, Away.
Dijelaskeun, acara ieu murni datang ti kahayang nonoman kréatif di Cipatujah. “Urang sadaya ngahaja ngulem Mang Yod, saurang anggota Déwan nu sanaos yuswana parantos kapala 7, mung sumanget sareng jiwana tetep ngora. Murangkalih milénial di dieu leres-leres ngaraos kawakilan ku ayana anjeunna di DPRD Jabar salami ieu,” pokna.
Samentara Yod dina sambutanna nétélakeun, ngarasa reueus kulantaran dukungan nonoman. “Abdi percanten yén énérgi aranjeunna éta nu ngadamel pangwangunan aya dina kaayaan lancar. Kréativitas nonoman nu ngadamel negri ieu maju,” ceuk Ketua Depidar SOKSI Jabar ieu.
Katémbong hadir dina acara silaturahmi ieu, para kades ti Kec. Cipatujah sareng sajumlah tokoh masarakat satempat, di sagigireun nonoman generasi milénial.**
Éditor: Dadan Hendaya
