BANDUNG geus kawentar jadi kota heritage. Kota nu pinuh ku paninggalan wangunan nu ngandung sajarah. Mancing kapanasaran mun ngabahas sajarah-sajarah nu aya di kota urang sadayana ieu. Tina sakitu lobana wangunan sajarah jeung paninggalan nu aya, Gedung Pensil jadi salah sahiji objék nu ngirut pikeun dibahas. Disebut Gedung Pensil lantaran desain arsitektur jeung wangunanna nu mangrupa wangun patlot (pensil).
Geding Pensil lokasina aya di Jl. Gatot Subroto No. 1, daérah Simpang Lima ieu geus diwangun ti taun 1918 jeung geus jadi salah sahiji cagar budaya di Kota Bandung. Daérah Simpang Lima ieu geus jadi puseur padagangan jeung pusat aktifitas pamaréntahan di Kota Bandung ti jaman baheula.
“Gedung Pensil diwangun 1918 nu jadi tempat usaha & kantor Mij Groote & Scholtz. Agén Ban Dunlop jeung Minyak Pelumas Shell. Wangunan Cagar Budaya, Perda Kota Bandung No. 19/2009.” Tulisan éta ditulis di wangunan Gedung Pensil sakaligus jadi bukti minangka Gedung Pensil ieu mangrupakeun cagar budaya nu boga sajarah.
Dilansir ti jabar.tribunnews.com, numutkeun nu niténan sajarah ti Komunitas Aleut, Ridwan Hutagalung, wujud wangunan éta nepika ayeuna can aya nu robah. “Teu terang saha arsitékna, dugika ayeuna wangunanna lengkep kénéh saluyu sareng aslina,” ceuk Ridwan mangsa dikonték ku Tribun Jabar taun 2019.
“Satutas mangsa kamerdekaan, kungsi dianggo janten kantor pausahaan dagang Panca Niaga, pami ayeuna mah janten kantor Danareksa,” pokna.
Editor : Rimaldi Pasya Mansoer
Foto: thetravelearn.com
