BANDUNG (NYUNDAYU), – Kahuruan narajang kantor Badan Perencanaan, Penelitan dan Pengembangan Kota Bandung, Jalan Aceh Kota Bandung, Senén (7/11/2022).
Seuneu mimiti katémbong kira-kira jam 10.00 WIB. Dinas Pemadam Kebakaran Kota Bandung langsung ngajugjug lokasi kahuruan. Salah sahiji saksi, Diona Apriliana nu mangrupakeun Kasubag Umum dan Kepegawaian Bapelitbang nyaritakeun, seuneu mimitina katingali ti susuhunan lantéy 2 Gedung Bapelitbang, perenahna di bagéan Litbang kira-kira jam 10.00 WIB.
“Awalna murangkalih tos ramé. Abdi ngadangu murangkalih ngajorowok ‘seuneu, seuneu, seuneu!’. Sateuacanna abdi ningal ti suhunan tos aya sora ngaguruh. Teu lami ti dinya nu sanés ku abdi dipiwarang turun abdi nu tipengker,” pokna.
Inyana nyaritakeun, suhunan tos rada doyong ka handap, jeung seuneu mimiti mapay ti suhunan gedung Bapelitbang.
“Ti suhunan éta tos doyong ka handap sareng tos seuneuan sadayana. Prédiksi abdi, di luhur tos kabeuleum sadaya, kumargi éta abdi nyungkeun sadayana diévakuasi,” émbohna.
Anjeunna ngungkabkeun, basa kajadian éta keur aya kagiatan ngabenerkeun suhunan di Gedung Bapelitbang. Sigana seuneu kaluar tina aktivitas éta.
“Leres urang nuju ngalereskeun suhunan, abdi teu terang padamelanna siga kumaha. Aya nu nuju damel di luhur,” ungkabna.
Numutkeun Diona, sadaya karyawan parantos diévakuasi basa kajadian kahuruan éta. Ngan dokumén jeung alat-alat gawé séjénna tacan kungsi kasalametkeun.
“Dokumén kabeuleum sadayana kalebet PC. Salangkungna urang tiasa nyandak laptop. Urang mentingkeun sadayana kaévakuasi heula,” ceuk Diona.**
Éditor: Abas
Foto: Istiméwa
