BRASILIA (NYUNDAYU), – Kajadian ieu bisa jadi salah sahiji cara ngejebol panjara pangbututna nu kungsi kajadian. Rarancang nu geus sampurna dijieun jadi ancur kulantaran beuratna awak. Rafael Valadao usaha nérékél ngaliwatan liang témbok panjara dina upayana kabur ti panjara Cérés, Brasil Tengah. Ngan upayana éta teu kalaksana kulantaran beuteungna nu bureuteu nyangked.
Tungtungna manéhna jadi tongtonan sipir panjara nu nyaksian sabari seuseurian basa patugas pamadam kabakaran datang pikeun ngabébaskeun napi nu awakna gendut éta. Ukuran awakna nu badag teuing teu asup kana liang leutik nu aya dina témbok panjara nu dijieun Valadao jeung babaturannana. “Manéhna miboga fisik nu badag pisan, jeung ogé jangkung pisan,” ceuk saurang patugas pamadam kabakaran satempat ka Telegraph. “Tahanan séjén nyobaan ngadorong ngan manéhna tetep kajebak dina témbok. Manéhna mimiti ngajorowok kanyenyerian, jeung pas éta panjaga panjara siaga,” émbohna siga dikutip tina Daily Star, Minggu (20/11/2022).
Daily Mail ngalaporkeun kajebakna Valadao dina témbok nyieun dua babaturan narapidanana, nu ogé miharep rék kabur, ngiluan kajebak di jero. Kadua tahanan nu nungguan kénéh pikeun kabur nyobaan ngadorong Valadao ngaliwatan témbok, ngan upaya maranéhna jadi parcumah jeung pamadam kabakaran datang sakitar jam 2 janari pikeun ngaleupaskeun nu gagal kabur éta.
Valadao saterusna dibawa ka rumah sakit sabari dikawal pulisi. Tulang iga manéhna kadiagnosa potong. “Manéhna ngajorowok kanyenyerian basa bantuan datang. Manéhna sigana teu maliré kana beuteungna nu gedé,” ceuk saurang juru bicara pulisi.**
Sumber: international.sindonews.com/Berlianto
Foto: dailystar.co.uk
