BANDUNG (NYUNDAYU.COM), – Salah sahiji profési lima taunan nu mucunghul unggal Pemilu Législatif (Pileg) nyaéta, naon nu sok disebut Uncal, alias Usaha Nipu Caleg. Profési ieu kaluar lamun loba caleg nu boga duit ngan teu miboga jaringan jeung pangalaman kontéstasi dina hiji pamilihan.
“Para caleg ieu tungtungna kajiret ku jalmi-jalmi nu ngaklaim manéhna miboga massa, mayar ka manéhna ku sajumlah artos, mung saterasna basa perhitungan suara kaluar, nyatana zonk,” ceuk mantan caleg nu apal pisan detail profési ieu, Jajang Zakaria, Minggu (3/12).
Hal ieu diungkabkeun basa jadi narasumber dina Podcast Gacor nu digelar Sahabat Mang Mahfud (SMM) Jawa Barat, di Bandung Interactive Hub, Jl. Maskumambang 39 Bandung. Rumah Pergerakan ieu diresmikeun ku pangadeg SMM, Iwan Setiawan, nu ogé ilubiung jadi narasumber Podcas dina sesi nu béda.
Numutkeun Jajang, ti sisi para Uncal, sikep ngangkangan para caleg éta asalna dumasar tina pangalaman, loba caleg nu basa geus jadi anggota déwan, mipohokeun pajonagan para rélawan atanapi personal nu ngabantuan manéhna.
“Jadi daripada teu kenging nanaon, langkung saé maranéhannana ngarit di payun we mangsa kampanye atawa sosialisasi, ku api-api nyebutkeun gaduh seueur massa pamilih. Padahal upami calegna tiasa ngémut, kedahna anjeunna naroskeun, naha sanes nu nawarkeun jasa wé nu janten caleg pami gaduh seueur pamilih mah,” pok Jajang nu dibarengan ku seuri ratusan hadirin nu nyaksian Podcast.
Samentara éta, Iwan Setiawan ngedalkeun, dibentukna Bandung Interactive Hub ieu nyaéta jawaban tina kahoyong pikeun ngahijikeun kréativitas wargi Bandung. “Bumi ieu kabuka kanggo umum, mangga dongkap kanggo sharing rupi-rupi ide demi kamajuan sasarengan bangsa ieu,” tandesna.**
Éditor: Dadan Hendaya
