BANDUNG (NYUNDAYU), – Anggota Fraksi Partai Golkar Dr. Hj. Cucu Sugyati ditunjuk salaku Ketua Pansus Penyelenggaraan Perhubungan dan Ketenagalistrikan DPRD Jawa Barat. Pansus nu strategis ieu dibentuk, di antarana, pikeun nyaluyukeun jeung sagala rupa isu mutakhir, kaasup Undang-undang Cipta Kerja.
“Ku kamekaran Perhubungan di Jabar, kedah disiapkeun régulasi-régulasi anyar. Kitu ogé ayana Proyek Strategis Nasional (PSN) sareng Proyek Strategis Asing (PSA) di wewengkon Jabar, kedah diantisipasi ku aturan enggal nu adaptif,” cek Cucu, basa dikonték media, di padumukanna di Bandung, Rebo (12/4).
Numutkeun anjeunna, pasualan angkutan panumpang jeung barang ogé kudu diatur leuwih hadé. “Émang leres, angkutan barang mangrupakeun urusan pusat. Namung fungsina dikadalikeun tiasa janten kawenangan provinsi. Kumargi arus barang nu ngaliwatan wewengkin ieu, pan tiasa mangaruhan ka infrastruktur jalan nu aya,” tandes Wakil Ketua Depidar SOKSI Jabar ieu.
Salian ti éta, émboh Cucu, ku ayana Kereta Api Cepat oge kudu dirojong régulasi nu nyingkronkeun jeung nyinérgikeun antara kawenangan pusat jeung provinsi. Kumaha ogé, ku ayana KA Cepat kedah disupport infrastruktur di sakurilingna. Nepika, peraturan daérah (perda) kudu dijieun, umpana, dina aspék panartiban atanapi ku ayana sarana prasarana pangrojong. Tacan deui ku ayana aerocity jeung Bandara Kertajadi nu perlu rojongan régulasi pikeun terus bisa maju.
Sedengkeun dina masalah ketenagalistrikan, DPRD nganiléy, régulasi diperlukeun pikeun kasalametan jeung kamekaran ketenagalistirkan éta sorangan. “Urang sadaya nyandak conto perkawis ayana blankspot listrik basa kajantenan musibah tangkal rungkad. Atanapi tiasa ogé dina aspék hal-hal nu katingalna alit, sapertos langlayangan nu saleresna tiasa ngaganggu kabel sareng aliran listrik,” cek Ketua Kesatuan Perempuan Partai Golkar (KPPG) Jabar ieu.
“Kamekaran ketenagalistrikan ieu ogé pakait sareng énergi baru dan terbarukan. Urang sadaya kedah ngatur kumaha upaya nyiapkeun distribusi, dugika sumber daya naon wae nu diperyogikeun kanggo ngarojongna,” paparna.
Dijelaskeun, Pansus baris gawé kurang leuwih ti sabulan. Cucu dipirig ku dua wakil ketua, nyaéta Erni Sugiyanti, S.Ag. (PKB) jeung H.M. Achdar Sudrajat, S.Sos. (Partai Demokrat)**
Éditor: Dadan Hendaya
